Nga yaakamala okukwata ekyokuna mu mpaka za  Shell V-Power Pearl of Africa Uganda Rally, Munnayuganda omuvuzi wa mmotoka z’empaka, Yassin Nasser ekyuma akitutte mu za ‘Iringa rally’ e Tanzania wiikendi eno. 

Nasser, kyampiyoni w’engule y’eggwanga eya National Rally Championship (2019), wiiki emu emabega yakung’aanya obubonero 19 ku ngule ya Africa (ARC) mu za Pearl bwe yavugidde essaawa 2:09:09:7 emabega wa Jas Mangat (eyawangudde), Leroy Gomes ne Giancarlo Davite. 

Nasser ng'avuga Subaru GVB

Omwaka guno, Nasser yasalawo okuvuganyiza ku ngule y’e Tanzania gye yakulira oluvannyuma lwa basiponsa be okumusaba adde eyo kuba we wali amakanda gaabwe. 

Mu mpaka ezaggulawo kalenda y’e Tanzania (Atlantic rally of Morogoro), Nasser teyamalako oluvannyuma lw’emmotoka ye okufa ng’ali mu lukontana (section) olusembayo. We yawandukira, nga yaakulembedde. 

“Omuzannyo gwa mmotoka nagutandikira Tanzania mu 2015 wabula olwa bizinensi ze nnina mu Uganda, nasalawo okuvugira wano era mu 2019 nawangula engule, kati twazzeeyo okuvuganyiza awaka ate nayo tuwandiikeyo ebyafaayo,” Nasser bwe yategeezezza. 

Nasser

Agattako nti ekigendererwa si kusitukira mu ngule ya Tanzania omwaka guno kuba okuvuganya kungi nnyo naye alina okukkiriza nti asobola okumalira mu bifo eby’oku mwanjo era ng’ayagala kutandika na buwanguzi mu za ‘Iringa Rally’. 

“Abawagizi bange mu Uganda njagala babeere bagumu, nnina emmotoka bbiri, gyenvugira wano e Uganda n’eya Tanzania, mu Uganda nja kwetaba mu mpaka ezimu obutanneerabira naye nga sinoonya bubonero ku y’eggwanga,” Nasser bwe yakkaatirizza.