Kkooti egobye okusaba kw’eyasibwa olw’okufa kwa Mowzey Radio

KKOOTI ejulirwamu, egobye okusaba kwa Godfrey Wamala (amanyiddwa nga Troy) okw’okumukendeereza ku kibonerezo ky’emyaka 14 kye yamusalira mu gw’okufa kw’omuyimbi Mowzey Radio.

Radio Mowzey Bwe Yali Afaanana.

Mu 2019, kkooti yasalira Troy ekibonerezo kya kumala emyaka 14 mu kkomera ku musango gw’okufa kwa Radio. Era emyaka ebiri gye yali amaze ku limanda gyaggyibwako olwo n’asigala ku myaka 12.

Baamulumiriza nti mu 2018, ku bbaala emu e Ntebe, Troy yasindika Mowzey Radio n’agwa n’akubawo omutwe ogwakosebwa ennyo era n’atwalibwa mu ddwaaliro gye yafiira. 

Nga bamaze okumusalira ekibonerezo, Troy yassaayo okusaba kwe ng’asaba ekibonerezo kimukendeerezebweko nga kino kkooti ejulirwamu kye yagaanyi era n’emulagira mu kkomera, amaleyo emyaka gyonna egyamusalirwa.