Abageegeenya Pulezidenti Museveni ne Bobi Wine abawagizi babataddeko akazito

Wadde abasinga bamanyi Herbert Mendo Ssegujja, muyite teacher Mpamire okugegeenya Pulezident Museveni, ono munjogera ennyangu oyinza okugamba, mwana mulenzi, Sam Muwanguzi kati eyeeyita young Museveni amutadde ku bunkenke bwa Mayinja naye bw'asazeewo okwetunda mu sitaayiro y’emu n'atuuka n’okumwerabiza abantu.

Mendo alabye omuvubuka atandise okumubbako sho, kwe kukuba emmeeza nga bwe yebuuza ekiri ku bavubuka b’ennaku zino abakola ogw’okukopperera mu kifo ky’okuyiiya ebyabwe.

Ono yeegatiddwako abawagizi be nabo abatandise okulumba Muwanguzi ku mikutu gya Social Media.

Ebya Muwanguzi bibadde bikyali bityo, ate munne gw’azannya comedy (komedi), Ssali Shaufaruh eyeeyita Young Bobi naye abawagizi ba pulinsipo bamwambalidde nga bamulanga kutyoboola na kuzannyi mu bulumi bwa muntu waabwe.

Ono okumutabukira kyaddiridde okujja ku siteegi nga yeesibye okugulu ali ku miggo nga bw'ageegeenya Bobi kw’ebyo ebigambibwa nti yakubwa akakebe ka tiyaggaasi weeki ewedde.

Shaufaruh yalabye bamutaddeko akazito kwe kuddukira ku mukutu gwabwe ogwa Facebook ne yeetonda nga bwe yeewozaako nti yabadde mu komedi.