Aba 'Copy right' bongedde okunywera ; minisita abakakasizza ku tteeka

 Betty Amongi , minisita w’ekikula ky’abantu,awadde bannabitone essuubi n’akamwenyumwenyu ku matama bw’ababbiddeko nti Pulezidenti Yoweri Museveni yabalagidde okumaliriza etteeka erifuga ebiyiiye litandike okukola mu mwaka gw’ebyensimbi ogujja.

Etteeka lino erimaze ebbanga eddene nga lirumya bannabitone n’abayimbi omutwe lyakubayamba okwongera okufuna mu buyiiya bwabwe kubanga kijja kuba tekikyasobola muntu kuva eri n’amala gakozesa bintu byabwe nga tebasasuddwa.

Amongi yasinzidde ku mukolo gw’okusiima bannabitone abaasinze okukola obulungi mu kisaawe kya ffirimu mu Uganda ogwa ikon Awards ogwabaddewo wiikendi eno eyaakaggwa ku Lwomukaaga nga March 23, 2024 ku wooteeri ya Serena mu Kampala.

Minisita Amongi Ng'ali Ne Ramsey Nouah Ow'e Nigeria Ku Siteegi.

Yagambye nti gavumenti nneetegefu okussaawo embeera ennungi abayiiya naddala abali mu kisaawe ky’eby’amasanyu mwe basobola okukolera emirimu gyabwe obulungi olwo nabo ne bafunamu ku ssente.

Minisita Amongi era yagambye nti gavumenti yaakubayambako mu kutumbula ebiyiiye byabwe naddala ebweru w’eggwanga balabikireko ku mikutu nga Netflix n’emirala.

Ebigambo bya Amongi byasanyudde nnyo Omunigeria, omuzannyi wa ffirimu Ramzey Noah nga naye yabaddeyo era n’ategeeza abazannya ffirimu nti ssinga kino kinaaba kikoleddwa, baakwongera okweyagalira mu kisaawe kye balimu.