NRM eshangwire orubaju oruhakani omuri Rukungiri

N’ebya Nelson Ahimbisibwe

Ekibiina ky’eby’obutegyeki ekiri omubwebembezi ekya NRM kisingwire entebe z’abany’eishengyero zoona omu disiturikiti ya Rukungiri, ahi orubaju oruhakani rutwire rwine amaani maingi. Tihariho muntu weena kuruga omurubaju oruhakani ninga otaine kibiina obaasize kutwara entebe yoona ey’omuny’eishengyero omukaruuru ka boona akaateirwe ebiro 15.01.2026.

Disiturikiti ya Rukungiri etwaire eine akakwate kahango n’orubaju oruhakani omuby’obutegyeki kandi nikyegyekyererwa munonga ahari kirinju omuby’obutegyeki Col (rtd) Dr Kizza Besigye, owaayesimbire ahari Purezidenti Museveni emirundi 4 ahagati ya 2006 na 2016.

Besigye obwa hati ari omukihome Luzira omuri Kampala ahamishango ekwatiraine n’orukwe ah’ihanga.

N’obu haraabe hariho ebyafaayo ebi omu disiturikiti ya Rukungiri, ekibiina ekya National Resistance Movement kitwire entebe zoona ez’obuny’ishengyero ezirimu Rujumbura, Rubabo, Munisiparity ya Rukungiri hamwe n’ey’omuny’eishengyero omukazi.

Eishaza rya Rujumbura
Omu ishaza rya Rujumbura, akakiiko akarikukurira eby’oburuuru kakarangirira Maj. Gen. (rtd) Jim Muhwezi Katuguugu nk’omuny’eishengyero otoorainwe. Jim akarangirirwa orikukurira eby’okurangirira oburuuru, Abas Namara, ebiro 16.01.2026 omu ihangwe ahakitebe kikuru kya disiturikiti ya Rukungiri.

Muhwezi abaasize kwihayo oburuuru burikwingana 25,005 nikwo kusinga Fred Tumuheirwe Turyamuhweza owa People’s Front for Freedom (PFF) otungire oburuuru23,307. Abandi ababeire beesimbire ni Ariho Nasasira owa FDC oyihireyo oburuuru 439, Gerald Karenzi Kooli otaine kibiina oyihireyo oburuuru 285, Hillary Tumuhimbise owa NUP oyihireyio oburuuru 252 na Simon Niwagaba otaine kibiina otungire oburuuru 110.

Omukugamba kwe bwanyima y’okumurangirira, Muhwezi kandi ori minisita w’eby’okwerinda, ayebarize abateezi b’akaruuru ahabw’obushagiki bwabo kandi yaaraganisa kuhikiiriza ebi yaaraganiise arikusherura akaruuru.

“Nyine amashemererwa ahabw’obwesigye obu abantu ba Rujumbura bateiremu. Niinyija kukora obutaruha kuhikiiriza ebi ndaganiise kandi ndeebekye ngu entunguuka yaahika omuri buri nshonda y’eishaza,” nikwo agizire.

Eishaza rya Rubabo
Omuri Rubabo, Mathias Mwesigwa Rwabugumi owa NRM akarangirirwa nk’omusinguzi bwanyima y’okwihayo oburuuru 16,102 nikwo kusinga Naboth Namanya owa PFF kandi oine entebe egi owatungire oburuuru 14,780. Abandi babeire beesimbire ni Alex Bob Rugonde otaine kibiina n’oburuuru 13,545, David Tushabomwe Ndindirize otaine kibiina otungire oburuuru 3,452, Andrew Niwabiine otaine kibiina otungire oburuuru 971, Allan Nabaasa owa FDC, otungire oburuuru 548, Arnest Ngabirano Katara otaine kibiina otungire oburuuru 313, Moreen Tumwebaze oyaine kibiina otungire oburuuru147 na Eunice Nshabamagara ow DP otungire oburuuru 55.

Rwabugumi ayebarize abateezi b’akaruuru ahabw’okumwikiririzamu kandi yaashaba okukwatanisa omubatuura boona agumize ngu abo ababeire nibashagika abantu abandi bakore nawe kutunguura eishaza rya Rubabo na disiturikiti ya Rukungiri okutwariza hamwe

“Entunguuka neeruga omumaani n’obujunaanizibwa bwaitu tweteeraine hamwe. Ninyeta abo boona, abateire akaruuru ntarikushoroora, kwija tukakwatanisa tukatwara Rubabo omumaisho,” nikwo agizire.

Munisiparite ya Rukungiri
Omu Munisiparite ya Rukungiri, Gen (rtd) Henry Kakurugu Tumukunde owa NRM akarangirirwa ku asingire akaruuru nk’omuny’eishengyero bwanyima y’okutunga oburuuru 7,115. Ogu asingire Ingrid Kamateneti Turinawe owa PFF kandi hoona oyihireyo oburuuru 6,268.

Abandi ababeire beesimbire barimu Wallen Nuwagaba Tumwine otaine kibiina n’oburuuru 297 na Richard akanyijuka nawe otaine kibiina otungire oburuuru 53.

Tumukunde ayebarize abatuura ahabw’okumwesiga kandi yasiima gavumenti ya NRM ahabw’okusherurira abantu baabo obushagiki omukukaruuru.

“Ninsiima obwesigye obu abantu ba munisiparite ya Rukungiri banyorekire. Tukwataniise, nitwija kureebeka ngu entunguuka yaahika omuri buri nshonda eya Munisiparite,” nikwo agizire.

Omuny’eishengyero omukazi

Ahantebe y’omuny’eishengyero omukazi, Mary Paula Kebirungi owa NRM akarangirirwa nk’omusinguzi ahari shaaha nka 9 z’omu itumbi bwanyima y’okwihayo oburuuru 59,448. Asingire Medius Natukunda Kaharaata ori omuntebe egi kandi oyihireyo oburuuru 32,794.

Abandi ababeire beesimbireho ni Betty Bamukwasa Muzanira owa PFF oyihireyo oburuuru 18,227, Innocent Kashobera Nabaasa otaine kibiina otungire oburuuru1,063 na Christine Tusanyuke owa FDC otungire oburuuru 844.

Bwanyima y’okurangirirwa, Kebirungi akeebaza abateezi b’akaruuru, akakiiko akarikutebeekanisa oburuuru hamwe n’ab’eby’okwerinda ahabw’okutaho oburuuru bw’obusingye

“Ninsiima obushagiki hamwe n’obwesigye bw’abantu. Twena abarikukwatwaho, nitwija kureebeka ngu disiturikiti ya Rukungiri yaagumizamu n’omuhanda gw’entunguuka,” nikwo agizire. 

Empinduka omuby’obutegyeki

Ebirugire omukaruuru ka 2026 bireetsireho empinduka omuby’obutegyeki bwa Rukungiri, omwanya ogwabeire gwetwa ogw’orubaju oruhakani. Abarikuhanuura ahanshonga z’eby’obutegyeki nibagira ngu ekireeteire NRM yaasingurira ah’iguru n’ahabw’okugira engiri y’amaani hamwe n’okuburwa ebikongi kuruga omurubaju oruhakani oteireho n’okukomwa kwa Kizza Besigye.

Ebirugire omukaruuru bibaasa kureetaho akamanyiso k’empinduka omuby’obutegyeki omu disiturikiti etuura neehayana n’ekibiina ekiri omubutegyeki

#WestUpdates
#UgandaDecides2026