Kampala Queens FC eyingizzaawo ekyasi kya Fazilah Ikwaput

WAKATI nga Kampala Queens FC beetegekera okwetaba mu mpaka z’okusunsulamu ttiimu eneekiikirira zone 5 mu champions league w’omupiira gw’abakazi, baleese omuteebi Fazilah Ikwaput abanoonyeze ggoolo.

Kampala Queens be bakyampiyoni ba liigi y’omupiira gw’abakazi ey’oku ntikko gye baawangudde omwezi oguwedde ku bubonero 47 mu mipiira 18, wiini 15, amaliri ga mirundi ebiri ne bakubwa omulundi gumu.

Ku ndagaano ya myaka ebiri, Ikwaput yeegasse ku Kampala Queens ng’ava mu Omona Nicosia eya Cyprus nga Uganda be bagenda okutegeka z’okusunsulamu zino (CAF Women Champions League Zonal Qualifiers) mu August w’omwaka guno.

Queens FC

“Ssanyu nina lingi okukomawo awaka naddala Kampala Queens ejjuddemu abazannyi abali ku ttiimu y’eggwanga eya Crested Crane, ekirooto kyange kwe kuyambako ttiimu yange okwesogga Champions League w’omupiira gw’abakazi era nzikiriza nti ssinga tukolera wamu kino tugenda kukituukiriza,” Ikwaput bwe yategeezezza.

ono alina obumanyirivu mu mpaka ez’enjawulo, yazannyiddeko ttiimu z’ebweru w’eggwanga okuli; BIIK Kazygurt eya Kazakhstan, Kerala Blasters eya Buyindi ne Omona Nicosia eya Cyprus.

Ikwaput eyasitukira mu kapyata w’emmotoka ya Airtel FUFA Award (2017) ng’omuzannyi omukazi eyasinga, Wano mu ggwanga yazannyirako essomero lya Highway SSS Sironko e Mbale, Olila High School WFC, Lady Doves WFC kati ne Kampala Queens FC