Gor Mahia eya Kenya ekansizza Kaddu abadde omuteebi wa Kitara FC
GOR MAHIA FC eya Kenya ekansizza abadde omuteebi wa Kitara FC mu Big League Patrick Kaddu ku ndagaano ya mwaka gumu abayambe okubanoonyeza ggoolo.
Gor Mahia eya Kenya ekansizza Kaddu abadde omuteebi wa Kitara FC
By Gerald Kikulwe
Journalists @New Vision
Kaddu okuva bwe yeegatta ku Kitara ku ntandikwa ya sizoni eno abateebedde ggoolo 15 mu mipiira 15 n’abayamba okwenywereza ku ntikko ya Big League n’obubonero 31.
Omutindo guno gwe gusikirizza eyaliko omutendesi wa Uganda Cranes Johnathan Mckinstry nga kati y’ali mu mitambo gya Gor Mahia okusendasenda abeegatteko.
Ono ajjukirwa nnyo nnyo bwe yateeba ggoolo eyatwala Cranes mu AFCON wa 2019 Uganda bwe yali emegga Cape Verde (1-0) mu z’okusunsulamu.
Okusinziira ku kiwandiiko okuva mu ttiimu ya Kitara, Kaddu asitula ku Lwakubiri (January 24, 2023) okugenda okwegatta ku Gor Mahia.
Mark Twinamatsiko atendeka Kitara agamba nti okuvaawo kwa Kaddu tekugenda kukosa Kitara y’adde abadde abawaniridde era bamwebaza, wabula baakusigala nga bakozesa abazannyi abaliwo okusigala nga bawangula emipiira.
Erisa Sekisambu, Shafik Batambuze, Khalid Aucho, Godfrey Walusimbi, Dan Sserunkuma be bamu ku bannayuganda abaali bazannyiddeko mu Gor Mahia, kati ne Kaddu abeegasseeko.