Eyali ssita wa Cranes awadde bamusaayimuto essuubi
ABAAGUSAMBAKO mu Cranes baabugaanye essanyu n’abamu ne lizaalamu amaziga bwe baasisinkanye oluvannyuma lw’emyaka egisoba mu 30.
Bannabyamizannyo nga bali ne Chuni
By Kato Kawuma
Journalists @New Vision
ABAAGUSAMBAKO mu Cranes baabugaanye essanyu n’abamu ne lizaalamu amaziga bwe baasisinkanye oluvannyuma lw’emyaka egisoba mu 30.
George Sserunjogi, eyazannyira Coffee, KCC ne Cranes mu gy’e 80 ne Godfrey Mukasa Shafic, eyasambira NYTIL ne Simba mu bbanga lye limu, be baabuze okufa essanyu nga basisinkanye ku mipiira gya liigi y’abayizi ba Caring Heart Schools e Kaggala-Wakiso ku luguudo lw’e Hoima ku Lwokuna.
Chuni ne banne
Sserunjogi akolera mu kitongole ky’ebisolo (Uganda Wildlife Authority) sso nga Mukasa nneekoleragyange mu kibuga London ekya Bungereza nga baasemba kulabagana mu 1993 bwe yali nga tannagenda ku kyeyo. “Musajja ggwe okyaliyo? Allah Akbar! Amagulu gakyalimu bbaaka?,” Mukasa bwe yalamusizza Sserunjogi nga bwe bagwang’ana mu bifuba.
Abaagusambako abalala abaabaddewo ye; Godfrey Nyola ‘DHL’ (NYTIL ne Express), Issa Ssekatawa (NYTIL ne Express), Obadiah Ssemakula ‘Musanvu w’Eggwanga’ (Coffee), ne Pasita Paul Musisi (Express) ng’ono ye nnannyi masomero ga Caring Heart ate nga ye yatandikawo ekibiina ekigatta abaagusambako ekya Former Footballers Initiative (FFI). Kino kati kikulirwa John Ntensibe.