Aba Deutsche Welle basiimye munnamawulire wa Bukedde
Ekitongole ky’eby’amawulire mu ggwanga erya Germany ekya Deutsche Welle kisiimye omusasi wa Bukedde Tv David Musisi Kalyankolo ow’e Mukono ne satifikeeti emwebaza ng’omu ku bannamawulire abaabulako akatono okulugulamu obulamu, abeewaayo okukola omulimu gwabwe mu mbeera eyali enzibu ennyo eya Covid 19.
Aba Deutsche Welle basiimye munnamawulire wa Bukedde
NewVision Reporter
@NewVision
Kalyankolo, ajjukirwa okukubwa eyali akulira poliisi y’e Nakisunga Noah Mukose n’omuggo ogwamutuusaako olubale olw’amaanyi ku mutwe n’addusibwa mu ddwaliro nga biwalattaka, bwe yali akola omulimu gwe ku ntandikwa y’omwaka oguwedde, n’amala ku kitanda emyezi egyawera.
Peter Limbourgh avunaanyizibwa ku kitongole kino, mu bubaka bwe ku mutimbagano yannyonnyodde nga satifikeeti zino bwe zaaweereddwa bannamawulire mu mawanga ag’enjawulo okwetooloola ensi okuli ne Africa olw’obuvumu bwe baakozesa mu biseera by’omuggalo okulwanirira eddembe lyabwe ery’okwogera n’okukola omulimu gwaabwe wakati mu mbeera ey’okunyigirizibwa awatali kutya.
Satifikeeti Eyaweereddwa Kalyankolo Owa Bukedde Tv.
Yategeezezza ng’era awaadi zino bwe zaagabiddwa okulaga obwetaavu bwa bannamawulire naddala mu biseera eby’obutabanguko okumanyisa abantu ebibeera bigenda mu maaso olw’ensonga nti gwe mulimu gwabwe, era bw’atyo n’asaba gavumenti mu nsi zonna okuvumirira embeera ey’okutyoboola eddembe lya bannamawulire wabula babalwanirire.
Kalyankolo yasiimye satifikeeti eyamuweereddwa kyokka n’asaba bannamawulire bonna mu mawanga ag’enjawulo okulemerako, n’okuba abavumu mu buli mbeera yonna okukola obulungi omulimu gwabwe awatali kutya.