Tekinologiya America gw’ereese okuziikula Ayatollah gye yeekukumyeTekinologiya

AMERICA ereese tekinologiya anaaziikula omukambwe wa Iran, Ayatollah gye yeekukumye.

Ng’olutalo lwa America ne Iran lubindabinda, Iran yakukulidde omukulembeze waayo ow’oku ntikko, Ayatollah Ali Khamenei mu mpuku, nga takyatuukibwako, ekireetedde America okuleeta tekinologiya alumika mu mpuku.
Tekinologiya ono amanyiddwa nga ‘Project Maven,’ omukutu gwa Wikipedia gumwogerako bw’akozesa ‘AI’ (Artificial Intelligence).

Yakolebwa ekitongole kya National Geospatial-Intelligence Agency, ng’anoonyereza n’okuketta ebiri e buziizi.
Alina kye bayita ‘machine learning and data integration,’ ebisobola okutegeeza engeri omuntu gy’akozesaamu ebyuma okunoonyereza ne bigattagatta ebinoonyerezebwa okuggyamu amakulu. Mu ngeri eno, ennyonyi enkessi okuli EA 18G-Gowler n’ennyonyi za drone ekika kya MQ-4 Triton essaawa eno eziri mu Persian Gulf eririraanye Iran, zikozesebwa okukwata amaloboozi.
Okufeffetta kuno, kwatandika dda ng’omukambwe oyo tannakka wansi mu mpuku nga Pulezidenti wa America, Donald Trump agamba bamanyi w’ali naye balinze balabe okuteesa bwe kugenda. Mu ssaayansi ono, anoonyezebwa olunaku lw’asembyeyo okulabikako mu kitundu ennyonyi ziri zisigala zifuna kye bayita ‘spy sensors’ okumulondoola.
ENGERI GY’AKWATA AMALOBOOZI N’ENTAMBULA ZA AYATOLLAH
Obuuma bwa Spy sensors, buwuliriza-okuwunyiriza n’okuketta ebiri wansi mu ttaka, ku mukutu gwa yintaneeti kye baayise, ‘detect underground movement by picking up, filtering, and analyzing seismic vibrations and acoustic noises transmitted through the soil;
Ssaayansi ono, akolera ne mu payipu (cable) ezisimbibwa mu ttaka. Ezimu zikola bwambega nga buli ayitawo, omusinde gw’akola guwulirwa. Ssaayansi oyo naye bamuyita ‘Ground Sensors oba Buried Cable Systems.’
Y’omu era akozesebwa okuwuliriza entambuza y’ebyokulwanyisa. Bambega ba America aba CIA, olwamanya ekitundu w’ayingidde empuku, baasigala bawunyiriza omusinde gwe n’abantu be. Ne bw’ava mu mpuku emu okudda mu ndala, bamugoberera. Abalala abamukuuma bali bweru, kino kiwa tekinologiya ono okugoberera omusinde gw’abantu bana bokka.
Omukutu gwa Wikipedia gugattako ebigambo, ‘Detect the seismic vibrations generated by footsteps, vehicles, or digging,’ ebitegeeza okuwuliriza abatambulira mu ttaka, entambuza z’emmotoka wansi eyo nga ne bwe baba basima okwongera ku buwanvu bw’empuku, era kimanyibwa.
Obuuma obwo obuwaniriddwa ‘drone’ n’ennyonyi endala enkessi bwe bumala okuwunyiriza, buweereza amaloboozi mu ku setirayiti olwo AI n’asengejja okukakasa omuntu gwe banoonya. Waliwo kye bayita ‘Operational systems’, ebyo biba biwedde sisitiimu emaliriza omulimu y’eddako. Ekitebe ky’eggye lya America ekya Pentagon, kizze kikozesa tekinologiya ono mu ntalo okusaanyaawo bannalukalala mu Syria, Yemen, Iraq n’ebirala.
Mu lutalo lw’okuwamba Nicolas Maduro owa Venezuela, tekinologiya y’omu baamukozesezza okukakasa nti, Maduro ne mukyala we Cilia Flores, baali mu nkambi ya Fort Tiuna gye baabaggya.
AYATOLLAH BW’AGENDA OKUZIIKULWA MU MPUKU
Nga tekinologiya amaze okukakasa Ayatollah waali, kisigalira kakiiko k’amagye ga America okusalawo kye bamukolera. Basobola okumuyungulira eggye lya Delta Force okumunona nga bwe lyakola Maduro, oba okumuttira mu mpuku. Bwe basalawo kumuttirayo, bamusindikira ennyonyi ekika kya Northrop B-2 Spirit Heavy Strategic Bomber. Eyo ekozesa ‘tekinologiya alemesa ebyuma ebiketta ennyonyi. Iran erina bingi naddala ekika kya S-300 by’ezze egula mu Russia. Ennyonyi y’emu era ye yakuba empuku za Iran gy’eweeseza bbomu za nukiriya.
Esitula bbomu enzito ekika kya GBU-57 MOP Bunker Buster. Bbomu eyo w’ekubye tewali kisigalawo ate ng’ekkira ddala wansi mu ttaka. Ekuba empuku n’egifuula ebiri wansi ne bidda ku ngulu