Poliisi etegese olusiisira lw'ebyobulamu mu bitundu bye Buvuma, Buikwe ne Buvuma

POLIISI mu kitundu kya Ssezzibwa omuli Kayunga Buvuma ne Buikwe, bategese olusiisira lw'ebyobulamu, okuyamba ku bantu abatawanyizibwa endwadde ez'enjawulo.

Olusiisira luno, lwakubaawo ku Lwokuna nga baggulawo poliisi e mpya eya Wakisi police Station mu nkola ya Sub County Policing Model . Enkola eno yatongozebwa omuduumizi wa poliisi mu ggwanga Abbas Byakagaba gyebuvuddeko,  nga yakwetoolola ebitundu eby'enjawulo.

Ku lunaku luno, era bakussaawo desk abantu abalina emisango egitakoleddwako bulungi gye banagenda okwemulugunya .

Omuduumizi wa poliisi mu Ssezzibwa Jaffari Magezi, annyonnyodde nti , abasawo ba poliisi bakubeerawo okuwa abantu obujanjabi mu nkola ey'okuddiza ku bantu olw'obuwagizi eri poliisi.

Asabye abantu okugenda mu bungi e Wakisi enkya, bamanye poliisi bw'ekola emirimu gyayo, awamu n'okufuna obujanjabi. Wakisi, eri wansi wa poliisi y'e Njeru.

Agasseeko nti poliisi ekwasisa empisa eya Professional Standards Unit { PSU }, nayo yakubaawo okufuna okwemulugunya okuva mu bantu eri abasirikale, abatakola bulungi mirimu.