Poliisi esabye abantu okubeera abasaale mu kulwanyisa obumenyi bw'amateeka

OMUKWANAGANYA wa poliisi n’omuntu wa bulijjo mu bitundu bya Kampala n’emiriraano SSP    Donald  Muhwezi, asabye bannayuganda okubeera n’obuvunaanyizibwa okukuuma eddembe lyabwe nga beenyigira m,u kuziyiz aobumenyi bw’amateeka.
Abyogeredde ku mukolo gw’ebikujjuko bya poliisi y’e Katwe okujjukira olunaku lw’okulwanyisa obumenyi bw’amateeka olwa “Crime Free Festival” gy’abadde omugenyi omukulu. 

Aba Poliisi nga bakola bulungibwansi

Batandise na kukola bulungi bwa nsi okulongoosa ebitundu ebiriraanye poliisi eno okubadde; Katwe, Makindye, Kibuye mu Katale, Ndeeba n’ebitundu ebiriraanyeewo nga bakulembeddwaamu band, bakira buli webatuuka nga boogerako n’abantu okwongera okunyweza enkolagana ya poliisi n’omuntu wa bulijjo, nga balekawo ennamba z’amasimu okubakubirako nga waliwo ebitagenda bulungi.
Oluvanyuma  bageenze ku  poliisi y’e Katwe awabadde  omukolo nga ogwetabiddwaako  omuduumizi wa poliisi ye Katwe   Innocent Mubangizi,  Oc Fred  Aheebwa, omukwanaganya wa poliisi n’omuntu wa bulijjo ku poliisi eno ASP Gilbert Nyaika, abaserikale,   n'abalala nga omugenyi omukulu abadde  omukwananya wa poliisi  n’omuntu wabulijjo mu Kampala n’emiriraano SSP. Donald Muhwezi.
Muhwezi asabye abantu mu biseera bino byetugendamu eby’ennaku enkulu n’okulonda okubeera obulindaala, kubanga beebasookerwako ku bukuumi bwabwe ate bakwatagane bulungi ne poliisi okulaba nga buli kimu kitambula bulungi.

Atwala poliisi ye Katwe Fred Aheebwa ng'ayogerako eri abaserikale

Abasabye buli muntu okusuzaako essimu ye ng’eriko ne ssente ezisobola okukubira abeby’okwerinda okutaasa embeera enzibu singa ebeera ebaluseewo mu bitundu byabwe, n’abalabula obutagezaako kukola ffujjo naddala mu biseera bya kampeyini byetulimu n’okulonda, agende alonde oyo gwayagala, ate aleme kutataaganya mulala ayagala owuwe omulala.
Akyukidde abaserikale naabakuutira okuyisa obulungi abantu, baleme okubaliisa kakanja n’okubaggyamu ssente nga batutteyo emisango, ekintu kyagambaye nti kikyamu ekivumaganyisa gavumenti.

Akulira poliisi n'omuntu wa bulijjo ku poliisi e Katwe ASP Gilbert Nyaika

DPC w’e Katwe Innocent Mubangizi, ategeezezza nti,  poliisi y’e Katwe erina obuzibu kuba etwala ekitundu ekimu ku bisingamu obumenyi bw’amateeka mu Kampala, naasaba abantu okukolagana obulungi ne poliisi, nga ye nsonga ebakozesezza bulungi bwa nsi okunyweza enkolagana eyo, babategeeze ebirina okukolebwa okusinga okukozesa amaanyi.
Kubanga bwebagaana okukolagana nayo  ate baggyayo omukono gw’ekyuma nga bweguli ku masomero, nti wadde omuyizi yabeera boosi era asasula abasomesa ssente, naye bwasiwuuka empisa ate kibooko evaayo nebamutereeza.
  Beegattiddwaako ebibiina eby’enjawulo oku;li; KCCA, Friends of Uganda, Pepsi, Nina Interiors, Crown Japan, Climax 1 Entertainment hub, Vox Lounge, Farmers Center Kibuye n’abalala.

SSP Donald Muhwezi akulira Poliisi n'omuntu wa bulijjo mu Kampala n'emiriraano

Akulira ekibiina kya  Friends Of Uganda Nasif  Muhumuza agambye nti, ekibeegassizza ku poliisi,  kwekujjukiza bannayuganda nti,  Uganda buvunaanyizibwa bwaffe ffenna, nti era kikyamu okwonoona ebintu ebiyamba bannayuganda bonna olw’endowoozayo ggwe ng’omuntu.
Naasaba bannayuganda okukulembeza omukwano gwa Uganda mu buli kimu, bave mu ndowooza ya nfuniramu wa, bateeke  ku bbali obukyayi bweby’obufuzi bakulembeze omukwano gw’eggwanga lyaffe Uganda n’okukuuma emirembe egiriwo bangi gyebeegomba