Paapa eyalondeddwa lwe yakyala mu Uganda

PAAPA Leo XIV eyalondeddwa ku Bwappaapa ku Lwokuna lwa wiiki eno, yajja mu Uganda ng’akyali Musumba mu mwaka gwa 2015.
Yajja ne Paapa Francis era buli kiseera yamubeeranga ku lusegere.
Mu nsisinkano ya Paapa Francis ne Kabaka Ronald Muwenda Mutebi II, mu maka ga Ssaabasumba w’Essaza ekkulu erya Kampala (mu kiseera ekyo yali omugenzi Cyprian Kizito Lwanga), Prevost yali ku lusegere lwe era ng’akola omulimu gw’okuvvuunula byonna ebyali byogerwa.
Mu kiseera ekyo, Paapa Francis yali yaakamuwa Obusumba bw’Essaza ly’e Chiclayo mu ggwanga lya Peru.
Ssaabasumba w’eggulu ey’awummula, John Baptist Odama, era eyali ssentebe w’olukiiko lw’Abasumba ba Uganda mu kiseera ekyo yakakasizza nti, ddala kituufu y’ajja ne Paapa Francis mu Uganda era ng’ebiseera ebisinga ye yali omutaputa we.
Yagambye nti, naye yamubeeranga kumpi nga banyumya ebitonotono, era si musajja wa bigambo bingi.
“Yasula ku wooteeri ya Sheraton era twabanga naye ebiseera ebisinga,” Odama bwe yagambye.
Paapa okujja mu Uganda yali azze kwetaba mu bikujjuko by’okujjukira Abajulizi okuweza emyaka 50 bukya Abajulizi ba Uganda balangirirwa mu batuukirivu.