Owa Bodaboda abadde adduka Poliisi agudde mu mmotoka n'emuttirawo
OMUGOBA wa boodabooda abadde adduka poliisi ng’atya okumukwata olw’okutikkako omusaabaze agudde mu mmotoka n’emuttirawo.
Owa Bodaboda abadde adduka Poliisi agudde mu mmotoka n'emuttirawo
By Patrick Kibirango
Journalists @New Vision
Akabenje kano kaguddewo leero ku ssaawa 12:45 ez’oku makya omuvubuka Geoffry Tumuheirwe abadde avuga pikipiki ekika kya Bajaj Boxer nnamba UFA 380B emmotoka bw'emutomeredde e Bukesa .
Ddereeva w’emmotoka ekoze akabenje kano Ismal Lubega olumaze okumutomera n'adduka aba boodabooda ne bamugoba ne bamukwata ne bamutwala ku poliisi ya Kampalamukadde n'emmotoka ye nnamba UBK 565B .
Poliisi Ng'ejjawo Omulambo Gw'owa Boodabooda (2)
Poliisi ya Kampalamukadde ng’ekulembeddwamu agiduumira Livingstone Kandiho etuuse mu bwangu n'eggyawo omulambo n’egutwala mu ggwanika e Mulago.
Ababaddewo ng'akabenje kagwawo bategeezezza nti Tumuheirwe abadde ava mu bitundu by’e Nakulabye ng’aweeseeko omuntu ng’abasirikale ba poliisi ababadde ku pikipiki bamugoba omusabaze ye alabye taabisobolr n'abuukako.
Poliisi Ng'ejjawo Omulambo Gw'owa Boodabooda (1)
Abasirikale baasigadde bagoba Tumuheirwe abadde anaatera okutuuka ku bitaala by’e Bakuli kwe kwagala awete adde ku luguudo lwa Sir Apollo awo waagwiiridde mu mmotoka n’emuttirawo.
Aba boodabooda bavudde mu mbeera ne bagumba ku poliisi ya Kampalamukadde nga baagala babawe abasirikale ababadde ku pikipiki eyaviiriddeko munnaabwe okutomerwa kyokka DPC Kandiho n'abalagira okwerondamu 4 ayogere nabo kye bagaanye era ne babagobawo.
Poliisi Ng'enyezeza Eby'okwerinda Mu Bitundu Bye Nakulabye Okutangira Aba Boodabooda Okwekalakaasa (2)
Basazewewo okuziba oluguudo lw’e Bukesa mu bitaala era poliisi n'eyungula basaja baayo ne babatwalaganya nga tebalinya.