Omusomesa ajaguza emyaka 50 ng'asomesa

Bya Ssenabulya Baagalayina

OMUSOMESA omugundiivu Noella Namukasa ow'emyaka 73 ajaguzza emyaka 50 ng'akakkalabya ennoni.

 Akabaga yakakoledde ku ssomero lye erya Novic Day & Boarding Pulayimale e Lukaya mu Kalungu.

Mmisa yakulembeddwa Bwannamukulu w'Ekigo kya St Jude Lukaya Rev Fr Henry Kiganda, Fr Kabanda n'abalala.

Town Clerk W'ekibuga Ntebe, Aisha Kitenda (ku Ddyo) Y'omu Baayita Mu Ngalo Za Madam Namukasa Ajaguza Emyaka 50 Mu Busomesa.

Namukasa agamba nti okusomesa yakutandikira mu masomero  g'obwannannyini ng'asasulwa 360/- we yafunira ddiiru y'omuntu eyamutwala asomeseze e Kenya ku musaala gwa 2,000/- eza wano.

Ebyembi bamutuusiza mu bwa House Girl era n'abukola ng'alabirira abaana nti  bwe yayiga Oluswayiri n'asomesa abaana bano eby'omu bibiina olwo bakamaabe ne bamugattirako n'abemiriraano.

Madam Namukasa N'abamu Ku Basomesa Be Ng'abamu Yabasomesaako

Abamu Ku Baasomesebwa Madam Namukasa Abawadde Obujulizi

Noella Namukasa Ng'agenda Mu Mmisa Mwe Yeebalizza Katonda Okumumazaako Emyaka 50 Mu Busomesa.

 Wano we yafunira omukisa ogusoma dipulooma ye mu busomesa n'oluvannyuma yadda kuno n'agikakasiriza e Nkozi.

 Asomesezza mu masomero ag'enjawulo mu Mpigi, e Masaka n'akomekkereza mu Kalungu okutuusa bwe yazimba essomero erirye mw'akuumidde obukadde bwe.

 Mu kujaguza olw'emyaka 50 yeebalizaamu Katonda gw'agamba nti y'amusobozesezza okubaako abantu bangi baagunjudde  n'abafuula aboomugaso mu ggwanga.