Omusajja asse mukyala we gw'alinamu abaana 8 ng'alumiriza nti 2 ku bo si babe

Omusajja omufumbo akutte mukyala we gw’alinamu abaana munaana n’amukuba ekyuma ku mutwe olumaze okumutta omulambo aguvugidde mu mmotoka n’agitwala mu bikajjo n’agisuulawo n’omulambo n’abulawo.

Enju Bateganya Gy'abadde Azimba Ku Bbiici ye e Busagazi

Ronald Bateganya ow’e Busagazi mu ggombolola y’e Najja y’asse mukyala we Batty Kagoya bw’amaze n’aweereza obubaka nga naye bw’agenda okwetta ekyeraliikirizza ab’oluganda lwe.

Abdallah Tiifu Mudenya Ng'akaabira muwala we gwe basse.

Kigambibwa nti Bateganya omuvuzi wa ttakisi ku Kiyindi Stage alumiriza mukyala we okuzaala abaana ebbali era nti ku baana omunaana be balina, ababiri si babe ba basajja ab’enjawulo ku kyalo.

Kigambibwa nti era yamukutte ne Askari akuuma biici yaabwe e Busagazi okumpi n’amaka gaabwe.

Abatuuze b’e Butavujja mu ggombolola y’e Najjembe mu disitulikiti y’e Buikwe be baalabye mmotoka mu luguudo oluyita mu bikajjo ne batuukawo kwe kulabamu omulambo gw’omukyaala ne bayita abakulembeze nabo abaayise Poliisi okuva e Lugazi.

Poliisi ng'eteeka omulambo ku kabangali yaayo.

Poliisi bwe yatuuse yategeezezza nti babadde bafunye alipoota ekiro nga bwe waliwo omusajja eyaweerezza banne amaloboozi ku ssimu nga abategeeza nga bw’asse mukyala we olw’obwenzi nga takyasobola nti era agenda kwetta akooye okuswala.

Ab’oluganda baatuuse ne bakakasa nti omuntu waabwe eyabuze ne bba kyokka baagezezzaako okunoonya mu bikajjo omusajja n’abula.

Omusajja eyasse mukazi we alese amaloboozi agoogera amannya g’abasajja ababadde baganza mukyala we n’abo abaamuzaalamu abaana n’abasaba bakuze bulungi abaana b’alese, bwe bigaana babaleke bafe, mukama bw’anaaba ayagadde.

Ba Mulekwa Nga Bakaaba.

RDC Juma Kigongo atwala munisipaali y’e Lugazi avumiridde eky’abafumbo okutting’ana n’abasaba bulijjo okwogera ebizibu byabwe ne mikwano gyabwe oba aboobuyinza era n’avumirira n’ekyabakyala abazaalira abaana mu bufumbo abatali ba mu maka ago n’agamba nti baleetawo nnyo obusambattuko.

Omulambo gutwaliddwa mu ggwanika ly’eddwaaliro e Kawolo ng’okunoonyereza bwe kugenda mu maaso.

Bataganya eyasse mukazi we.