Omubaka Nantaba alidde matereke ne balooya ba Nabadda mu kkooti e Mukono

Bya Eric Yiga

EYALIKO minisita w'ebyempuliziganya ne tekinologiya era omubaka omukyala owa disitulikuti y'e Kayunga,  Aidah Erios Nantaba awuniikiriza kkooti bw'agitegeezezza nti bukyanga abaawo tamanyagako nti akakiiko k'ebyokulonda kalina ekibanja ku mutimbagano.

Nantaba abadde alabiseeko mu maaso ng'omulamuzi Collins Accellam owa kkooti enkulu e Mukono okwewozaako mu musango ogwamuwawaabirwa omulonzi Ritah Nabbada ng'amulumiriza okwenyigira mu kugulirira abalonzi mu kalulu akawedde.

Wakati ng'ali mu kaguli ng'abalooya ba Nabadda okuli; Gregory Byamukama ne Kevin Amujongo bamubuuza ebibuuzo ebyokumuukumu akinooganyiza nti nga bw'atamanyagako nti omuntu ayagala okumanya ebimukwatako oba mulonzi  asobola okukozesa omutibagano okubifuna.

Rose Nakabugo Okuva Mu Ofiisi Ya Ssabaminisita Ng'ali Mu Kaguli.

Omubaka Nantaba takomye awo agenze mu maaso n'asiiwuuka empisa  nga bamusoya ebibuuzo ebimuggye mu mbeera n'ayambalira bapuliida ba Nabadda n'abalagira obutaddamu muwogganira nga bamubuuza ebibuuzo, nga kino kiddiridde okuba ng'abadde yeebalama ebibuuzo, ekiwaliriza omulamuzi okumuvira mu mbeera n’amulagira addemu ebibuuzo nga bwe babimubuuzizza, era gye bigweeredde ng'atandise okubasooza.

Embeera eyogedde okutabuka, oluvannyuma lwa kkooti okuggwa,  Nantaba n'atabukira bapuliida be Nabadda n'abalangira obusiiwuufu ssaako n'okumulemerako mu kkooti.

Rose Nakabugo, ng'omukungu okuva mu ofiisi ya Ssabaaminisita ng'ono aleeteddwa omubaka Nantaba okumuwolereza ku bintu ebyagabibwa ku kyalo Kabatanyi ekisangibwa mu ggombolola y'e Galiraaya mu disitulikiti eno , ono ategeezezza kkooti ng'akulira abakozi mu disitulikiti bw'atalina nnyo lukusa ku bintu ebigabibwa minisitule y'ebyebigwa bitalaze ebibeera bireeteddwa mu kitundu.

Musango guno Nantaba aleese abajulizi babiri okuli; Rose Nakabugo okuva mu ofiisi ya Ssaabaminisita ssaako ne Sserwadda Kitaka ssentebe w'ekyalo Kyedikyo ate Ritah Nabadda naye aleese abajulizi babiri okuli: Abdul Kasozi ssaako n'eyaliko omubaka w'essaza ly'e Bbaale mu lukiiko lw'eggwanga olukulu.