Olutalo lwa Buyindi ne Pakistan;Abantu 40 bafudde, Ebibuga 9 bikubiddwal

BUYINDI ne Pakistan, zombi ezirina bbomu zzisabyalo eza nukiriya, ziggyeeyo emizinga, mizayiro n’ebyokulwanyisa ebirala eby’amaanyi ne zitandika okukubagana era emirambo egisoba mu 40 gyagudde ku njuyi zombi eggulo.
Okulwanagana kwatandise nga bukya eggulo ku Lwokusatu, Buyindi bwe yayungudde ennyonyi zaayo ennwaanyi z’esinga okwesiga ne zikola ennumba munda mu Pakistan ne zisuula bbomu n’emizinga ku byalo 9 gattako okukasuka ebikompola mu kitundu ky’e Kashmir ekifugibwa Pakisitan.
Mu bwangu obw’ekitalo, Pakistan yaggyeeyo emizinga gyayo egikuba ennyonyi ne giryoka gifukirira emizinga mu bwengula nga zizoolekezza ennyonyi za Buyindi ennwaanyi okukkakkana nga bakubyeko 5 ne zeerindiggula ku ttaka ne zituntumuka omuliro.
Olutalo luno okubalukawo kiddiridde wiiki bbiri ez’obunkenke wakati w’amawanga gombi okuva ku bulumbaganyi bwa April 26, 2025 obwakolebwa ku kibuga ekya Biici ekya Pahalgam mu kitundu kya Kashimir ekiddukanyizibwa Buyindi, omwafiira abalambuzi 26.
Mu bulumbaganyi obwo, kigambibwa nti abatemu baalondamu abantu ab’enzikiriza y’Ekihindu bokka be batta, Buyindi kye yalumiriza nti Pakistan ye yali emabega waakyo. Buyindi olwakoze olulumba ku Pakistan, minisitule yaayo ey’ebyokwerinda n’efulumya ekiwandiiko nti olulumba olwo luli wansi w’ekikwekweto ‘Operation Sindoor’, okuwa Pakistan essomo olw’ebikolwa byayo ebyekitujju.ABANTU 40 BAFUDDE
Minisita w’ebyokwerinda owa Pakistan, Khawaja Muhammad Asif yategeezezza omukutu gw’amawulire ogwa AFP nti Buyindi yakozesezza ennyonyi okusuula ebikompola ku bifo mukaaga eby’e Kashmir gye bazze bakaayanira, ne mufiiramu abantu ba bulijjo 26.
Ebitundu ebyasinze okukosebwa bye biri okumpi n’ensalo ya Buyindi mu ssaza ly’e Punjab.
Mu kwerwanako, Pakistan yeewaanye nga bwe yakubye ennyonyi za Buyindi ttaano (5) ne zisaanawo ekintu ekiyinza okwongera okulanza olutalo.
“Mu nnyonyi za Buyindi ze tukubye mulimu ez’ekika kya Rafale ssatu (3), eya SU-30 ne MiG-29, n’endala eyeevuga yokka eya Heron drone,” omwogezi w’eggye lya Pakistan, Lt-Gen. Ahmed Sharif Chaudhary bwe yakakasizza.
Kyokka ng’obulumbaganyi buno tebunnabaawo, Buyindi yabadde erabudde Pakistan okukomya okugezesa ebikompola nga bisukka amateeka g’ensi yonna. Buyindi yagambye nti olw’effujjo lya Pakistan lino, yafiiriddw abantu 3, olw’ekimu ku bikompola okuwandagala ne kisala ensalo ya Buyindi kwe kusalawo okwesasuza n’okuteekawo embeera ekoma ku Pakistan.AMERIKA NE CHINA ZIRAZE OLUDDA
Okulwana kw’amawanga gombi kutemyemu amawanga kirimaanyi nga Amerika erabudde amawanga gombi obutagezaako kukozesa byakulwanyisa ebya nukiriya.
Pulezidenti Donald Trump agambye nti kiswaza okulaba olutalo wakati wa Buyindi ne Pakistan okubalukawo n’awa abakulembeze b’enjuyi zombi amagezi okukkakkana wabeewo okuteesa.
Wabula yo China omusango egusalidde Buyindi nti ye yawakudde olutalo ku Pakistan, n’esaba ekibiina ky’Amawanga Amagatte okutawulula enjuyi zombi.OLUTALO KU KASHIMIR GYE LUVUDDE
Enkaayana ku ani alina okweddiza ekitundu kya Kashmir zaava dda, okutandikira mu 1947, Bungereza bwe yasalawo okuwa Buyindi ne Pakistan obwetwaze. Mu kiseera ekyo, ensi zino zombi zaakaayanira ekitundu kino ate nga n’abantu baamu baalema okulondako ensi mwe baba bateekebwa.
Gye byaggweera ng’ensi zombi zigabanye ekitundu kino buli omu n’atwalako oludda, w’abadde buli omu okutuusa leero ekyakaayana nti y’asaanye okukyeddiza kyonna.
Pakistan y’efuga ebitundu by’obukiikakkono n’ebimu mu bugwanjuba omuli; Gilgit ne Baltistan bo bye baatuuma Azad Kashmir.
Ate Buyindi n’efuga obukiikaddyo n’obuvanjuba nga bazze bafuna obutakkaanya n’okulwanagana ng’okusinga okujjukirwa kwe kwaliwo mu 1965 ne 1999.