Obunkenke mu kyondo kya Buwarabu: Iran ewambye emmeeri ya America

OBUNKENKE bweyongedde mu kyondo kya Buwarabu, Iran bw’ewambye emmeeri ebadde ekubyeko amafuta ng’egatwala e Turkey.

Iran okuwamba emmeeri kiddiridde America okukuba enfo za banywanyi ba Iran e Yemen mu lulumba olukyasinze okuba olw’omutawaana ng’eyambibwako Bungereza.

Enkambi America ne Bungereza ze baasuddeko bbomu ziyitibwa ‘Houthi military base’ ezisangibwa e Yemen. Baazirumbye nga bakozesa emmeeri ennwaanyi, ennyonyi ennwaanyi n’amaato ga lubbira agaasaanyizzaawo enkambi zino zonna ne zibengeya.

Olwamalirizza misoni eno, Pulezidenti wa America, Joe Biden yatenderezza ebibinja by’abajaasi abaagikoze n’agamba nti America yaakugenda mu maaso ng’ekola ennumba nga zino ssinga wanaabaawo obwetaavu.

Ebigambo bya Biden byajuuliriziddwa ebya Katikkiro wa Bungereza, Rishi Sunak eyagambye nti Iran ebadde etadde akatyabaga ku byamaguzi ebiyita ku nnyanja Emmyuufu ng’enkambi zino zibadde zisobola okukozesebwa okwonoona ebyobusuubuzi mu kitundu.

Abamu Ku Ba Houthi Nga Bawaga

Misoni eno teyakomye awo wabula yagasseeko n’okukuba enkambi endala eza Iran ne Yemen ezibadde mu kibuga ekikulu Sana n’ebibuga bya Yemen ebirala ebinene omuli Hodeida ne Saada, Iran n’esannyalala.

Minisita wa America ow’ebyokwerinda, Lloyd Austin yategeezezza nti baakubye n’ebyokulwanyisa bya Iran ebibadde byakaweesebwa mu nkambi zino omuli ennyonyi ezeevuga zokka (Drone), mizayiro eza ‘ballistic’, ebitangaaza ebibadde ku lubalama lwa ssemayanja ono n’ebyuma ebirala eby’obukessi.

Kigambibwa nti abakambwe aba Houthi abavujjirirwa Iran be baabadde mu nkambi zino, nga babadde bafuuse omuziziko omunene ku ntambula y’ebyamaguzi ku Red Sea.

EMMEERI IRAN GY’EWAMBYE

Oluvannyuma lw’obulumbaganyi ku nfo za Iran obwabaddewo mu kiro ekyakeesezza Olwokuna, Iran yayanukuzza muliro bwe yawambye emmeeri ya America eyabadde etwala amafuta ng’egaggya Iraq egatwala Turkey nga baagiwambidde mu katundu akayitibwa Gulf of Oman n’ezzibwa ku ludda lwa Iran