Nnamukadde atubidde ne muzzukulu we eyalwala omutima: Beetaaga obukadde 26 okumulongoosa

NAMUKADDE Esther Naigwe omutuuze w'e Bupadengo mu Kamuli atubidde ne Muzzukulu we Joram Magumba ow’emyaka 2 n’emyezi 9 eyalwala omutima.

Naigwe agamba nti mu mwaka oguwedde ogwa 2022, muzzukulu we yalwala era n’amuddusa mu ddwaliro lya Nile International e Jinja nga eno gye baamutegeereza nti omwana mulwadde wa mutima oluvannyuma lw’okumwekebejja.

Baamusingika ku ddwaliro e Nalufeenya nga eno baddamu ne bakebera omwana ne bakakasiza ddala nti mulwadde wa mutima era n’amalayo ebbanga lya wiiki ssatu nga omwana ali ku Oxgyen.

Oluvannyuma baamusiibula n’amala ewaka ennaku 3 ate omwana n'addamu n’atabuka ne bamuweereza e Mulago nga 05 January 2023. Agamba nti kyokka bwe yatuuka e Mulago ne bamutegeeza nga olukalala lw’abantu be balina okulongoosa mu kiseera ekyo bwe lwajudde nga alina kugenda Buyindi.

Baamugamba anoonye ensimbi 26,000,000/= omwana asobole okulongoosebwa mu bwangu.

Agamba ebiwandiiko byonna abifunye kyokka nga ky’akyanoonya z’ensimbi ez’okulongoosa muzzukulu we ono.

Asabye okuyambibwako nga bayita ku ssimu 0743123937 ne 0781401037.