Nabbanja asabye abakulira ebitongole bya Gavt. okuba abeerufu mu nkola y'emirimu

KATTIKIRO wa Uganda Robinah Nabbanja asabye abakulira ebitongole bya gavumenti ebivunaanyizibwa ku kugula n'okutunda ebintu bya gavumenti mu Uganda n'okwetoloola ensi yonna okukozesa nga amazima n'obwerufu  mu nkola y'emirimu gyabwe.

Nabbanja bino yabitadde mu bubaka bwe yatisse omumyuka we owookubiri, Dr Chrispus Kiyonga mu kuggulawo olukung'aana lw'ebitongole bino olw'omulundi ogw'e 10 olumanyiddwa nga International Public  Procurement  Conference nga lwayindidde  mu Kampala era ne lwetabwamu abakungu okuva munsi ezenjawulo.

Yategeezezza nti kumpi ebitundu 50% ebya bajeti y'eggwanga biggweera mu byamirimu n'okugula ebintu bya gavumenti, n'olwekyo abakungu mu bitongole bino basaanye okubeera abasaale mu kulwanyisa enguzi n'okweyambisa tekinologiya okutuusa obuweerereza ku bannansi ate mu budde .

Pulezidenti w'ekitongole kino ekya " International Public Procurement ", Polof. Fuguo Coa yakuutidde abakozi mu bitongole bino okubeera abeegendereza nga bakozesa  tekinologiya omupya owa AI mu nkola yaabwe ey'emirimu.

Aba Uganda Management Institute nga be baakulembeddemu enteetateeka z'olukung'aana luno baalaze obwetaavu bw'amawanga ku lukalu lwa Africa okukola enkyukakyuka n'ennoongosereza mu ngeri gye bagulamu ebintu bya gavumenti saako n'entambuza y'emirimu bannansi basobole okubiganyulwamu.