Lwaki Gavt. eragidde amasamero okuggalawo mu wiiki bbiri

GAVUMENTI eragidde amasomero okuggalawo ttaamu eyookusatu mu wiiki bbiri okuva kati. Abayizi aba nnassale, pulayimale ne siniya ababadde ab’okuwummula nga December 9, bagenda kuwummula nga November 25, 2022.
Bino byasaliddwaawo mu lutuula lwa kabineeti olwabaddewo ku Mmande mu maka g'Obwapulezidenti e Ntebe oluvannyuma lwa minisitule y'ebyenjigiriza okwegatta ku y'ebyobulamu n'ematiza baminisita ensonga lwaki abayizi basaanye bave ku ssomero ng'obudde bukyali ng'ensonga enkulu eyaweereddwa ya kutangira okusaasaana kw'obulwadde bwa Ebola obuli mu Uganda.
Bwe yabadde ayanjula ensonga eno eri bannamawulire eggulo ku Media Centre, minisita w'ebyenjigiriza ebisookerwako, Dr. Joyce Moriku Kaducu yagambye nti abasawo baakizuula nti abaana abato kyangu nnyo okukwatibwa Ebola nga bali ku ssomero kubanga baba balina okukwatagana ne bannaabwe ku ssomero n'abasomesa
baabwe.
N'ategeeza nti n'ekitongole ky'ebyobulamu mu nsi yonna ekya World Health Organisation (WHO) kyakoze okunoonyereza okulaga nti Ebola atta nnyo abato okusinga abakulu kwe kuwa Gavumenti amagezi nti singa abaana basigala ku ssomero ebbanga eriwera Ebola yandikwata n'okutta abawera kubanga kino kifo ekibakuhhaanyiza awamu mu bungi.
Dr. Kaducu yannyonnyodde nti abaana 23 be baakakwatibwa Ebola mu Uganda bukya abalukawo nga September 20, 2022 mu disitulikiti y'e Mubende. Ku bano abaana munaana bafudde so nga munda mu masomero baakazuulayo abaana abalwadde ba Ebola 11, omu eyali mu P6 mu ssomero erimu e Lubaga yafa ate bataano ne bassuuka. Yayongeddeko nti abaana 170 baateekebwa mu kalantiini olw'okukizuula nti baaliko n'abalwadde nga bava mu masomero ataano agali mu bitundu bya Kampala n'emiriraano.
Ku baana abalwadde kuliko owa 'baby class' omu, owa P2, P4 n'owa P7 nga bakyali ku bujjanjabi, ate e Mubende omu owa P5 baamujjanjabye n'awona nga balinayo omu
owa P4 ali ku bujjanjabi.
Yakkaatirizza nti newankubadde minisitule y'ebyenjigiriza etaddewo ebiragiro ng'okugaana abagenyi abava ebweru okuyingira mu masomero, okuteekawo ebiragiro
ebitangira okusaasaana kwa Ebola, okuggyawo ennaku z'okukyalira ,abayizi ku masomero, okugabira amasomero obuuma obupima ebbugumu e Mubende ne Kassanda,
bino tebimazeewo katyabaga abaana abali ku ssomero ke balimu olw'okuba babeera wamu buli kiseera kwe kuwa amagezi nti Gavumenti eyanguyirizeeko okuggyayo
abaana nga tegannafuuka kattiro.
Wabula yatangaazizza nti abayizi abakola ebibuuzo ebyakamalirizo okusukka olwa November 25 baakusigalayo, nti ekirungi bajja kuba batono era ku masomero tekujja
kuba mujjuzo.
EBIRAGIRO MINISITULE BY'EYISIZZA
1 Amasomero ku mitendera ogwa nnassale, pulayimale ne siniya gawummuze abayizi ku Lwokutaano nga November 25 awatali kulemererwa.
2 Abakulira ebyenjigiriza ku disitulikiti/Munisipaali/ mu bibuga n'abakulu
b'amasomero bateekese ekiragiro kino mu nkola era bakitegeeze abasomesa
n'abaana kireme kubagwako bugwi.
3 Amasomero gategeke ebigezo ebifundikira omwaka nga bukyali, abaana babikole badde eka. Wano Minisita yagambye nti bigezo oluggwa abaana badde eka oluvannyuma lipooti ziribasanga.
4 Oluvannyuma lw'abaana okudda eka, abakulira amasomero balina okufuuyira ebisulo
n'ebibiina, abaana bagende okudda omwaka ogujja ng'obuwuka bwonna bwafa.
5 Minisitule y'ebyentambula ya kuvaayo n'enteekateeka y'entambula abayizi bano
gye banaagoberera nga bawummula, eyinza okuba ey'ebibiina ebyenjawulo
ku nnaku ez'enjawulo waleme kubaawo mujjuzo mu ppaaka za ttakisi ne bbaasi ate
mwe bayinza okuggya obulwadde.
6 Minisitule ya kuyisa enteekateeka mwe banaawummuliza abayizi abasomera e Mubende n'e Kassanda (disitulikiti eziri mu muggalo) naddala eri abo abasomerayo naye nga baava mu disitulikiti ndala.
LWAKI YUNIVASITE N'AMATENDEKERO AMALALA TEGAGGADDWA
Kaducu yannyonnyodde nti ng'oggyeeko okuba nti, Ebola asinga kukosa baana bato, abayizi abakulu basobola okugondera ebiragiro ebitangira okusaasaana kwa Ebola ekitali ku bato. N'ategeeza nti, kyakkaanyiziddwaako amatendekero aga waggulu gasigale nga maggule wakati mu kugoberera ebiragiro ku Ebola.
EBIRINA OKUKOLEBWA AWAKA
Dayirekita w'ebyenjigiriza ebisookerwako ne siniya, Ismael Mulindwa yasabye abazadde okufuula awaka ekifo ekitalina bulabe eri obulamu bw'abaana baabwe
n'okukakasa nga tebagenda gye banaggya Ebola. Yagmbye nti olw'okuba awaka abaana tebaba mu bibinja binene nga ku ssomero kikendeeza ku bulabe bw'okukwatibwa Ebola n'ajuliza nti ne ku Covid19, ekyataasa abaana kwe kubazza awaka.
Yakuutidde abazadde okukuuma abaana baabwe obutatuuka ku bizibu birala ng'okufuna embuto