Katikkiro akubirizza bannayuganda abali e Norway obutayonoona ssente

KATIKKIRO wa Buganda Charles Peter Mayiga asabye abantu ba Buganda ababeera mu nsi ye Norway okweyigiriza enkola y’okuterekanga ensimbi ate zino oluvannyuma zikozesebwe mu pulojekiti z’okusiga ensimbi.

Yabadde asisinkanye abantu ba Buganda ababeera nsi ye Norway ku Lwokuna August 18,2022 akawungeezi ng’omukolo gwabadde mu ku African Cultural Institute ekiri mu kitundu ekiyitibwa Pilestredet mu kibuga ekikulu Oslo n’abasaba buli omu atereke ddoola 1000 buli omu nga bwezigattibwa awamu basobola okubeerako pulojekiti gyebakola.

Katikkiro ng'ali ne Bannayuganda abali e Norway

“Temujja buzi kubeera eno,mubeereko kyemugattako. Ensonga eyo nkulu era bwoba ogenderedde ensi ez’amaanyi,ensi ez’amaanyi,amawanga ag’amaanyi gabaako ekigoogerwako.Nagenda e Boston nga abe Ethiopia abaliyo basize ensimbi mu Amerika baguze n’ebizimbe nembuuza Bannayuganda ebyammwe biruwa,”Mayiga bweyategezezza.

Katikkiro Mayiga yayongedde naategeeza nga bweyasaba Bannayuganda abali e Boston okunoonyayo abantu 1000 nga buli omu asobola okutereka ddoola 1000 buli mwaka nga zino zisobola okukozesebwa  mu kusiga ensimbi,ekintu kyeyasabye n’abe Norway bakole.

“Mungambye nti mu Norway mulimu Bannayuganda 2000 naye omanyi abantu 2000 bwebali abangi ennyo,namwe musobola okutereka ddoola 1000 buli mwaka muteekewo ekirabika wano mu Oslo.Mukisobola ate ng’abalala bakisobola,”Mayiga bweyawabudde.

Yig 7

Kino Mayiga yagambye nti kyakuyamba Abaganda ne Bannayuganda bonna abali eno okuyitimuka ab’e Norway ne bagamba nti abo Bannayuganda,balina ekyamaanyi kyebajja nakyo munsi yaffe.

Mayiga eyabadde eyabadde ne Minisita wa Buganda avunanyizibwa ku bantu ba Kabaka abali ebweru, Joseph Kawuki yatuuse e Norway emisana g’Olwokuna August 18,2022 nga yayaniriziddwa ekibinja ky’abawereeza ba Kabaka ekyakulembeddwamu Baker Kabugo ng’ono yeyakikkiridde Omubaka wa Kabaka mu bitundu bya Scandinavia, Nelson Mugenyi, Jessica Nantongo- akulembera Abaganda e Norway.

Omukolo guno gwetabiddwako Joyce Agatha Oginere nga ye Ssentebe wa Bannayuganda e Norway, Omukungu David Ntege nga yatwala eby’abagenyi mu Bwakabaka, Simon Kaboggoza atwala Buganda Land Board, Simon Ssenkaayi okuva mu kitongole ky’e Nkuluze era asomesa abantu engeri y’okukyusamu obulamu bwaabwe n’abalala.