Inhebantu acamudde Abasoga

Inhebantu wa Busoga, Jovia  Mutesi avudde mu kisenge n’alabikako eri Obusoga omulundi ogusoose bukya ava mu mbaga ye ey’ebyafaayo ne Kyabazinga William
Wilberforce Kadhumbula Gabula Nadiope IV.
Gabula ne Mutesi baagattibwa ku lutikko y’e Bugembe nga November 18, omwaka oguwedde era abadde talabwako mu lujjudde okutuusa ku Lwokutaano bwe yalabiseeko eri Obusoga mu lubiri lwa Igenge mu Bugembe mu Jinja City.
Ng’ali n’akulira KCCA, Dorothy Kisaka, ba ssenga be, Omumyuka wa Katuukiro wa Busoga owookubiri, Osman Ahmed Noor, Minisita w’ebyobuwangwa Richard Mafumo,
Minisita w’ebyensimbi mu Busoga, Ivan Kiirya n’abakyala abalala, Inhebantu yasoose mu nnimiro n’abyaala ebikata bya lumonde, n’agenda ne mu lusuku n’ayunja enkota y’ettooke.
Omu ku bassenga be yamuyambyeeko n’agyetikka ku mutwe ne bagenda mu weema era Inhebantu yeegattiddwaako bassenga be abalala ne bawaata amatooke ne lumonde, n’alonda ebinyeebwa awamu n’okubisekula era nga bino byonna alaga omukyala Omusoga by’alina okukola mu maka ge.
Oluvannyuma yazzeeyo mu Lubiri n’akyuusa ggomesi olwo n’akomawo mu weema awaabadde omukolo ng’ali ne Kyabazinga, William Gabula Nadiope IV era baatambudde nga bwe bawuubira ku bantu abasoba mu 300 abaabadde
ku mukolo.
Mu kwogera kwe, Inhebantu yategeezezza nti, wadde ng’ensi egenda ekyukakyuka, waliwo obulombolombo n’ennono Abasoga bye balina okusigala nga batambulirako mu
maka gaabwe era n’amenya ebintu musanvu bye balina okukola. Kyabazinga Nadiope IV yasiimye ab’ekibiina kya Neyendeire olw’emirimu gye bazze bakola mu Busoga era n’akuutira Abasoga okukulembeza obwegassi nga batumbula enkulaakulana mu kitundu
kyabwe.
Kyabazinga yasiimye Pulezidenti Yoweri Museveni ne gavumenti ye, kkampuni ez’enjawulo ne mikwano gya Busoga, Obwakabaka obulala okuli; obw’e Tooro, Bunyoro, Buganda, Bugwere n’obulala okubakwatirako ne bakola embaga yaabwe ey’ebyafaayo omwaka oguwedde.
Kisaka nga y’akulira ekibiina kya Neyendeire Development Initiative, yasiimye Muky. Janet Museveni olw’okubawa ekirowoozo okutandikawo ekibiina kino mwe banaayita
okukulaakulanya abakyala mu Busoga.