NRM ezzeemu okwebbulula mu Wakiso oluvannyuma lw'okufuna ababaka basatu

EKIBIINA kya NRM mu disitulikiti ya Wakiso kyebbuludde mu disitulikiti oluvannyuma lw’emyaka 5 nga tekirina babaka bwe kikomezaawo ababaka basatu mu kulonda okwakaggwa.

Ebifo ebyakomezeddwawo kuliko ekya Busiro North ekyalimu Dennis Galabuzi ne kitwalibwa Paul Nsubuga owa NUP, Busiro South ekyalimu Peter Ssematimba n ekitwalibwa Charles Matovu owa NUP ne Ntebe Munisipaali ekyalimu Rosemary Tumusiime ne kitwalibwa Micheal Kakembo Mbwatekemwa owa NUP wadde nga yasaze nadda mu DF.

George Musisi ng'alangirirwa

Moses Mayanja yeyawangudde ekifo kya Busiro North n’obululu 19319 naddirirwa Ronald Ssemaganda owa NUP n’obululu 14667. Kenan Opio yawangudde Busiro South n’obululu 33812 ate Charles Matovu owa NUP nafuna obululu 26475.

Mu munisipaali ya Ntebe, Shyaka Steven Gashaija yafunye obululu 9114 ate Joyce Nabatta owa NUP nafuna obululu 4254. Ye Micheal Kakembo eyava mu NUP nadda mu DF era nga yemubaka abaddeyo yafunye obululu 562.

Abalala abaawangudde eby’obubaka e wakiso;

Wadde NUP baagisuzizza ebifo ebimu, ku kifo ky’omubaka wa Kyaddondo East, Nkunyingi Muwada yazeeyo mu Paalamenti bwe yawangudde n’obululu11613 nga Tom Muwonge atalina kibiina yafunye 4578 ate owa NRM Christopher Talemwa nafuna 2349.

Ku kifo ky’omubaka wa Nansana Munisipaali, Zambaali Bulasio Mukasa yafunye obululu 46134 n’amegga Idi Matovu Bugagga owa NRM eyafunye 16358. Betty Ethel Naluyima yawangudde eky’omubaka omukazi owa disitulikiti ku bululu 144460 ate Beth Kayesu owa NRM nafuna obululu 61882.

Ethel Naluyima ng'alangirirwa

Emmanuel Magoola Matovu atalina kibiina yawangudde ekya Busiro East ku bululu 35361 ate nga Haaj Abdul Kiyimba owa NRM yafunye obululu 17744. Kira Munisipaali, George Musisi owa NUP yafunye obululu 21561 ate nga Ibrahim Ssemujju Nganda owa PFF nafuna 14685 nga ye Daniel Kananura owa NRM yafunye 6927.

Makindye Ssabagabo, David Serukenya owa NUP yafunye obululu 29540 ate Pillip Munduni owa NRM nafuna obululu 6547