Gen.Musgisha Muntu awakanyizza ebyavudde mu kalulu ka Pulezidenti wabula n'ategeeza nti tagenda mu kkooti

GEN.Mugisha Muntu awakanyizza ebyavudde mu kulonda kyokka n'awera nti si wakudda mabega mu lutalo lw'aliko olw'okulwanirira enkyukakyuka.

Muntu nga y'omu ku baavuganyizza ku Ntebe y'omukulembeze w'e Ggwanga mu kalulu akaawanguddwa Pulezidenti Museveni asinzidde mu lukungaana lwa Bannamawulire lw'atuuzizza ku kitebe ky'ekibiina kye ekya ANT e Bukoto,agambye nti akalulu kaabaddemu Vvulugu mungi nnyo omwabadde okubba obululu,okutisatiisa abalonzi n'ebirala.

Wadde nga Muntu awakanyizza ebyavudde mu kalulu kyokka ategeezezza nti ye si wakugenda mu Kkooti olw'ensonga nti tebaasobola kuteekawo bakuuma kalulu mu bifo byonna ewalonderwa ebisoba mu 50,000 ekyabalemesa okukungaanya obujulizi obwenkukunala obwebasobola okweyambisa mu Kkooti.

Wabula Muntu asabye ebibiina by'oludda oluvuganya gavumenti ebirina obujulizi obumala okuddukira mu Kkooti bawakanye ebyavudde mu kalulu ng'agamba gyo emivuyo gyabadde mingi.

Muntu ye agambye nti obudde buno amaanyi gonna bagenda kugamalira ku kuzimba ekibiina okulabanga beyongera okufuna abakulembeze ab'ensa nga wano yasiimye abantu ba Hoima City West Division olw'okulonda Ismail Kasozi n'ategeeza nti eyo ntandikwa nnene nnyo gyebali.

Wabula Muntu alaze okunyolwa olwa Bannayuganda Obukadde 10 abewandiisa okulonda kyokka ne batalonda n'asaba wabeewo okunoonyereza okw'enjawulo ku ki ekituufu ekyalemesezza abantu bano okulonda.

Kyokka Muntu asaasidde Bannabyabufuzi ab'amannya ku ludda oluvuganya gavumenti abaasuliddwa mu kalulu k'Ababaka ba Palamenti omwabadde; Omubaka wa Kira Municipality,Muhammad Muwanga Kivumbi ow'e Butambala,Mathias Mpuuga n'abalala kyokka n'abagumya obutaggwamu maanyi basigale nga balwanirira