Bya Edward Luyimbaazi

 GAVUMENTI tennamaliriza kunoonyereza kwaayo ku misango egy’obutujju, obutemu, okubbisa eryanyi wamu n’okukiriza okubeera omuyeekera wa ADF egyaggulwa ku Abdul Rashid Kyoto agambibwa okuddumira abagambibwa okubeera omu ku bayeekera aba ADF abatta abalambuzi mu kkuumiro lye bisolo erya Queen Elizabeth e Kasese.

Abdul Rashid Kyoto 31, oluusi nga yeeyita Njovu oba Tembo nga yagambibwa okuddumira enkambi ya Domain e Mwalika mu DR.Congo era nga yaliko omutuuze  w'e Suni e Budaka  abadde akomezeddwaawo mu maaso g’omulamuzi Erias Kakooza akulira kkooti y'e Nakawa okumanya oludda oluwaabi we lutuuse mu kunoonyereza kwabwe ku  misango egyo.

Wabula omuwaabi wa gavumenti Samalie Wakholi yategeezezza ng’okunonyereza ku misango gino  bwe kutannaba kumaliriza era n'asaba babongereeyo ku budde.

Omulamuzi Kakooza akkiriza okusaba kw’oludda oludda oluwaabi  n'addamu okusindika Kyoto ku limanda mu kkomera e Luzira  okutuusa nga January,8,2024.

Okusinziira ku ludda oluwaabi olwakulemberwa Thomas Jatiko ne Lilian Omara kigambibwa nti Kyoto ne banne abalala abatannakwatibwa  nga October,17,2023  nga basinziira e Nyamunuka ku luguudo lwa  Katunguru-Katwe  Kabatoro mu kkuumiro ly'e bisolo erya Queen Elizabeth e Katwe  n'ekigendererwa  ky’okutiisatiisa Gavumenti nga   nga tebafudeeyo ku bulamu bwa bantu  mu kikolwa eky’obukambwe baakola ebikolwa eby’ettemu ebyavaako okufa kw'abalambuzi okwali  David James Barlow ne Cecilia Geyer Emmarentia  wamu ne Eric Alyai..