Enkuba erimu kibuyaga esudde amayumba 10 e Bamunaanika!

ABATUUZE b’e Baamunaanika ge bakaaba ge bakomba oluvannyuma lw'enkuba okusuula amayumba gaabwe!

Emu Ku Nju Eyabambuseeko Amabaati.

Ebyalo okuli  Kikandwa, Kanjuki, Tooke kkulu ebisangibwa mu Town Council y'e Kamira e Bamunanika mu disitulikiti y'e Luweero bye byakoseddwa oluvannyuma lw'enkuba okutonnyera essaawa eziwerako ng'erimu kibuyaga, omuzira era amayumba agasinga yagalese ku ttaka!

Akasolya Ku Ttaka.

Sulaiman Bugembe omuwandiisi ku lukiiko lw'e Kikandwa  yategeezezza nti ennyumba ezisoba 10 zabaambuseko obusolya  abamu ku baakoseddwa.

Ku batuuze abaakoseddwa kwabaddeko Haisha Naigaga , Anifa Dyoli , Ssaalongo Farouk ,David Osande  ,Yusufu Ssemyalo, John Ssegawa , Charles Gitta , Paul Kirya, Alex Byekwaso , Peter Kayemba n’abalala

Yusufu Muyonga, ssentebe wa LC y’e Kikandwa  yagambye nti abamu ku baafiiriddwa ebintu kuliko abaabadde baakafuna eza PDM ne batandika okulunda   ebisolo nabyo tebyalutonze.

Wano we yasabidde abakulu okuvaayo okudduukirira abantu  bano  n’okusala amagezi kuba enkuba etandika butandisi