Enkuba bw’etonya Abakristu beewala okugenda mu Eklezia - Ssaabasumba Paul Ssemogerere

Bya Juliet Anna Lukwago        

 Abakristu abamu enkuba bw’etonya beewalira ddala okugenda mu Eklezia, Ssaabasumba wa Kampala, Paul Ssemogerere bw’agambye.

“Abamu ng’enkuba entonye eby’okulinnya mu Klezia si bye babaako, naye mmwe mwebale kuguma ne mujja okusinza Omukama.” Ssaabasumba Ssemogerere bwe yategeezezza.

Bino Ssaabasumba Ssemogerere yabyogeredde ayigiriza mu Kitambiro kya Mmisa kye yakulembedde mu Eklezia y’Omutuukirivu Augustine ku kasozi k’abayivu e Makerere (St. Augustine Chaplaincy Makerere) ku Ssande.

Ssaabasumba Wa Kampala, Paul Ssemogerere Ng'akwasibwa Ebirabo Okuva Eri Siista Omu Ku Bakozi Ba University Ku Ssande

 Ku lunaku lwe lumu Eklezia kwe yakulizza olunaku lw’okusabira abaweereza ba Katonda ( World Day prayer for vocations) olukuzibwa mu Eklezia mu nsi yonna.

Yabadde ayambibwako alyowa emyoyo gy’abayizi mu ttendekero lino (chaplain), Fr. Josephat Ddungu,  abamyuka be Fr. Charles Lwanga Makoboza ne Fr. Richard Sseremba.

Abalala okwabaddeko; Fr. Tonny Lwazi okuva mu ssaza lya Kasana-Luweero, Fr. Tonny Akena (okuva Gulu Archdiocese) ne Fr. Godfrey Ssegujja nga bonna bayizi e Makerere.

Vice Chancellor, Polof. Barnabas Nawangwe (kkono) N'abalala Mu Kitambiro Kya Mmisa Ku Ssande E Makerere

Mu Kitambiro kya Mmisa kino mwetabiddwaamu abamu abakulembera yunivasite eno abakulembeddwa Vice - Chancellor, Polof. Barnabas Nawangwe.

Abalala kwabaddeko omubaka omukazi owa Masindi, Hon. Florence Akiiki Asiimwe, Ssaabakristu wa Chaplaincy eno Dr. Venny Nakazibwe, Abasiista wamu n’abayizi bangi. 

Yawadde Kofirmansio

Mu Mmisa yeemu Ssaabasumba Paul Ssemogerere yawadde abaana, abasomesa b’e Makerere n’abayizi 72 Essakramentu lya Kofirimansio, n’abamu ku bo ne bafuna Komunyo esooka (okusembera), n’abalala ne bamala omujiji.