Empaka za nnalulungi w'ebyobulambuzi mu Buganda zitongozeddwa

EMPAKA za Nnalulungi wa Buganda ow’Ebyobulambuzi eza Miss Tourism Buganda Kingdom ku mutendera gw’amatendekero zitongozeddwa abategesi ne bategeeza nga ku mulundi guno bwezigenda okwetabwamu n’abavubuka abalenzi.
Bw’abadde atongoza entekateeka eno ku yunivasite e Kyambogo, ssentebe wa Nkobazambogo mu Uganda, Moses Ssemujju Mwanje ategeezezza nga bwebakizudde nga abantu abeetaba mu mpaka zino tebasigala kye kimu mu mbeera zaabwe ezabulijjo kwekusalawo ku mulundi guno okuteekamu n’abvubuka.

ssentebe wa Nkobazambogo, Moses Ssemujju Mwanje (akutte omuzindaalo wakati) nga atongoza empaka

Ategezezza nga abalenzi bwebabadde basubwa emikisa egy’enjawulo egiri mu kwetaba mu mpaka zino era nga ku mulundi guno bakakasa nti kebetabyemu nabo bagenda kufuna ku bibala by’empaka zino.
Ategeezezza nti oggyeko okubeera obubeezi mu mpaka kyongera okunyweza enkolagana mu bantu ba Buganda bonna nga kino kijja kuyamba okuzza Buganda ku ntikko.
Ssemujju ategeezezza nga omulamwa gw’omuundi guno bwegwateereddwa ku kukozesa omutimbagano n’emikutu emigattabantu okutumbula eby’obulambuzi n’obuwangwa.
Asabye abavubuka bonna abali wakati w’emyaka 18 ne 28 okujja okuzetabamu basobole okufunamu Nnalulungi ne Sserurungi wa Buganda ow’Ebyobulambuzi kiyambeko n’okunyweza obuwangwa bwa Buganda.
Nnalulungi w’Ebyobulambuzi mu ssaza lye Buddu, Claire Nassali Kibudde abuulidde abavubuka ebintu eby’enjawulo ebyetaagisa okuvuganya mu mpaka zino kyokka n’abakuutira okukulembea empisa.

ssentebe wa Nkobazambogo, Moses Ssemujju Mwanje (akutte enkumbi) nga asimba omuti gw'ekijjukizo

Ssentebe w’empaka z’omwaka guno, Shafik Kyagulanyi ategezezza nga bwebali mu kawefube okutuukirira abavubuka ab’enjawulo okujja okwetaba mu mpaka zino n’asaba buli muvubuka okujja okuzenyigiramu kubanga ekintu kino kyabwe bonna.

Asabye abantu ba Buganda bonna okuvaayo bawagire abo bonna abaagala okwesimbawo okuvuganya n’okubalaga obulungi obuli mu mpaka zino.
Allan Kakembo nga ye Maneja w’amasiro ge Kasubi nga ava ku kitongole kya Buganda Heritage and Tourism Board era nga bebategeka empaka zino asabye abanetaba mu mpaka zino okunyweza obumu bwebaba baakutuuka ku biruubirirwa byabwe.