Baagala amagoba agaggyibwa ku ssente eziwolwa abalimi gakendeezebwe

EBIBIINA by’obwegassi bisse omukago ne bbanka ya Equity ne biteeka omukono ku ndagaano y’okukolera awamu mu pulogulaamu y'okusobozesa abalimi n’abalunzi mu ggwanga okwenyigira mu bulimi n'obulunzi wakati mu nkyukakyuka z’embeera z’obudde.

Kino bakituumye Africa Rural Climate Adaptation Finance Mechanism (ARCAFIM) nga yaakumala emyaka 12. 

Minisita Ngobi Ng'ayogera.

Omukago guno gutunuulidde okulaba butya bwe bagenda okubangula abalimi mu bibiina by’obwegassi okwenyigira mu kulima n’okulunda wakati mu nkyukakyuka mu mbeera z’obudde ezitali nnungi basobole okusigala nga bafuna emmere gye balya ne gye batundako. 

Pulogulaamu eno eguvujjirirwa ekitongole kya International Fund for Agricultural Development (IFAD) abagenda okukwata ssente bazisse mu Equity Bank, olwo yo ezituuse ku biibiina by’obwegassi by’esse nabyo omukago.

Mu bino kuliko Uganda Co-operative alliance, Uganda Central Co-operative Finance Services Ltd (UCCFS) ne Uganda Cooperative Savings and Credit Union Limited (UCSCU) olwo abalimi bayite mu bibiina bino okuzeewola nga balung’amizibwa minisitule y’ebyensimbi. 

Minisita omubeezi avunaayizibwa ku bibiina by’obwegassi, Fredrick Ngobi Gume, yasanyukidde omukago guno era n’ategeza nti ekibadde kisinga okutawaanya abalimi ge magoba amangi ge babinikibwa ku ssente ze beewola bw’atyo n’asaba gakendeezebwe. 

Ssabawandiisi Wa Uganda Co Operative Alliance Ltd, Ivan Asiimwe N'akulira Equity Bbanka Elizabeth Kasedde Nga Basayininga

Ssaabawandiisi wa Uganda Co-operative Alliance Ltd, Ivan Asiimwe, yategeezezza nti abantu abasoba mu bukadde 18 mu Uganda bali mu bibiina eby’obwegassi (cooperatives) n’ategeeza nti mu mukago bakukola nnyo okulaba nga bamanyisa abalimi bano nti wadde embeera y’obudde esoomooza, naye tebalina kuwanika wabula balina kulaba bwe basobola okugikoleramu. 

Akulira Equity, Elizabeth Kasedde, yagambye  nti wabaddewo omuwaatwa gw’okuba nti babadde tebalondoola ssente ze bawola abalimi okulaba bwe bazikozesa nti kyokka mu mukago guno kigenda kusoboka era basobole n’okubawa amagezi ku nnima ey’omulembe etakosa mbeera za budde. 

Akulira Uganda Central Co-operative Finance Services Ltd (UCCFS), Patrick Bagunda yategeezezza nti babadde baatandika dda okwenyigira mu kutaasa obutonde omuli n’okugabira abantu ssola era n’agamba nti baakwongeramu amaanyi nga bayita mu ssente ze bagenda okufuna.