Ateebye ggoolo ssatu n'abbulula Kawempe Muslim

Kawempe Muslim 4-1 Rines SS WFC 

HADIJAH Nandago omuwuwuttanyi wa Kawempe Muslim yateebye ggoolo ssatu ku wiikendi n’agenda mu byafaayo bya kiraabu eno ng’omuzannyi wa Kawempe Muslim asoose okuteeba ggoolo ezo mu liigi y’abakazi omwaka guno. 

Eggulo ku Ssande, Kawempe yamezze Rines SS ggoolo 4-1 mupiira gwe baabadde beetaga ennyo oluvannyuma lw’okukola amaliri ne UCU Lady Cardinals (1-1) wiiki ewedde. 

Ayub Khalifa atendeka Kawempe Muslim yagambye nti teri ttiimu yonna egenda kujja mu maka gaabwe e Kawempe eggyewo obubonero bwonna kuba sizoni eno ttiimu ekola bulungi ate n’abazannyi bamanyi kye baagala mu kaseera kano. 

Kawempe, yazze mu kifo kyakutaano ku bubonero munaana mipiira 5 sso nga yo Rines SS y’ekoobedde ku ttebo.