Ogwa Kawempe Muslim eguggye 'magombe' mu liigi y'abakazi

Egyazannyiddwa mu liigi y'abakazi

UCU Lady Cardinals 2-1 She Mak

Olila H/S WFC 4-1 Uganda Martyrs LWFC

Rines S.S WFC 4-1 Asubo Gafford LFC

Lday Doces FC 0-1 Kampala Queens FC

Kawempe Muslim LFC 1-1 She Corporate FC

BAWALA ba Ayub Khalifah Kiyingi aba Kawempe Muslim baayongedde okulaga nti sizoni eno tebagenda kujoogerwa waka.

Eggulo, Kawempe Muslim yalumye n'ogw’engulu okukola amaliri ga (1-1) ne She Corporate mu liigi ya babinywera ey’abakazi.

She Corporate yazze mu nsiike eno ng'erina ennyonta ya wiini oluvannyuma lw'okukola amaliri ne Lady Doves (1-1) wabula byagitabuseeko Kawempe Muslim bwe yakoze ennumba ez'okumu kumu ng'abateebi baayo basubwa emikisa egiwedde.

Aziza Amoding owa Kawempe Muslim (ku kkono) ng'attunka ne Annitah Arinda owa She Corporate.

Ng'ekitundu ekisooka kinaatera oguggwaako, Spencer Nakacwa owa She Corporate yateebedde ttiimu ye (mu ddakiika ya 44), wabula mu kitundu ekyokubiri, Kawempe Muslim yakomyewo n'obukodyo obw’enjawulo obwatadde abazibizi ba She Corporate ku bunkenke okukkakkana Hadijah Nandago ateebye ey’ekyenkanyi.

Ayub Khalifa obwedda eyeecangira ku katebe, bakira afalaasira abazannyi be obutaddamu kusubwa mikisa egivaamu ggoolo bwe baba baagala okuvuganya ku kikopo kya sizoni eno.

Amaliri gano gaatadde Kawempe Muslim mu kyokutaano ku bubonero 10 sso nga yo She Corporate ekwata kyamusaanvu ku bubonero 7.

Kampala Queens y'ekulembedde ekimeeza n'obubonero 21, UCU Lady Cardinals 13, Uganda Martyrs 13.