Akabenje katuze 14 e Bugiri

 Bya Musa Balikoowa

ENTIISA ebuutikidde ekyalo Butema mu Town Council y'e Muwayo mu Bugiri, mmotoka mukaaga bwe zitomeraganye abantu 14 ne bafiirawo, omu n’addusibwa mu ddwaaliro ly'e Bugiri ng'ataawa.

Akabenje kaaguddewo ku ssaa­wa nga 4:00 ez’ekiro ekyakeesezza eggulo, emmotoka mukaaga okuli; lukululana nnya ne kamunye bbiri bwe zaatomereganye nga ziyisih­hana. Emmotoka ezaakoze aka­benje kuliko eya ttuleera nnamba No. KDH 407T, ttuleera nnamba UAV 579N, ttakisi nnamba UAW 963M n’endala.

RDC wa Bugiri, Paul Mwidu Kalikwani eyakedde ku ggwanika e Bugiri, yagambye nti yasanzeeyo emirambo 10. Kyokka bwe yatu­use awaagudde akabenje abatuuze ne bamutegeeza nti olw’okuba poliisi yaluddewo okutuuka, wali­wo abazze ne baggyayo emirambo gyabwe ena ne bagitwala.

Abamu ku baafudde kuliko; Juliet Bakulimya abadde kkan­sala w’eggombolola y'e Buluguyi ku disitulikiti, Yosamu Wasike ow'e Busia, Hajara Nandego ow'e Muterere, Munnakenya Jemus Kitavewo, Shalif Sempijja (Mu­wayo) Joyce Nabirye (Busia) Ant­ony Mulokole (Muwayo) n’abalala abaabadde batannategeerekeka.

Abaabaddewo ng’akabenje kagwawo bagamba ttakisi bbiri ezaabadde ziva e Bugiri nga zi­genda Busia zaabadde ziwenyuka buweewo nga buli emu erwana esooke ku siteegi y'e Muwayo. Eyabadde mu maaso nnamba UAW 963M yayisizza ttuleera bbiri nazo ezaabadde zigenda e Malaba.

Nga zaakayisihhanya gye zaasanze ttuleera endala bbiri ezaabadde zidda e Bugiri. Olw’okuba zonna zaabadde zid­duka, zaayambalaganye emu n'ekwata omuliro n’ebengeya.

Poliisi y'e Bugiri oluvannyuma lw’ebbanga eggwanvu, yaggyeewo emirambo 10 n’egitwala mu ggwanika ly'eddwaaliro e Bugiri. RDC Kalikwani obuzibu yabutadde ku bavugisa ekimama ne waasiwaasi n’agamba nti osanga singa mmo­toka zaabadde tezidduka nnyo nga ne ttakisi tezikola waasiwaa­si, akabenje tekandiguddewo.

Yanenyezza n’abaserikale ba ttulafiki abasabiriza abantu ssente ne balemwa okwekebejja em­beera z’ebidduka n’okukakasa nga baddereeva balina ebisaanyizo. Yavumiridde n’abasaba abantu ssente okuggya emirambo gyabwe mu ggwanika.

Omwogezi wa poliisi mu East Busoga, Diana Nandaula yagambye nti ensonga y’akabenje kano yat­waliddwa bakama be ab'e Kampala era be balina okugyogerako.