Abali ku gw'okusaddaaka omukazi e Bukomansimbi boogedde omuwendo gw'abantu bebasaddaase ne bawuninkiriza  ab'ebyokwerinda

ABANTU 7 abaakwatibwa ku byokusaddaaka abakazi mu gombolola ye Bukango mu disitulikiti ye Bukomansimbi omulamuzi abasindise mu kkooti enkulu e Masaka batandike okwewozaako ku misango gy'okutta Hadijja Nalugira.

Nalugira yattibwa nga 29/10/2025 bweyali ava mu Maka ga Ssaalongo Robert Kimbugwe gyeyali akola nga Yaya nga adda mu makage wabula abattemu ne bamuzindukirizza ne basalako ensingo omusaayi ne bagulembeka ,kwossa okumusalako ebitundubye ebyomubirigwe n'oluvanyuma omulambogwe ne gusulibwa mu kiddiba ekimanyiddwa nga Kyanamirira.

Nga wayise ennaku bbiri nga Nalugira tadda waka abaanabe n'abatuuze bakola omuyigo gyebazuulira omulambogwe nga gusuliddwa mu kiddiba kino.

Abatuuze bayita poliisi ye Bukango bukubirire nayo eyasitukiramu ne tandika omuyigo okuzuula abantu abali emabega w'ettemu lino okukakana nga ekutte Moses Kabogere eyalonkooma bane okuli Ssaalongo Robert Kimbugwe, George Ssegirinya, Onesmus Muramuzi, omusawo w'ekinansi Godfrey Mugabi, Henry Ssekate, Julius Agaba.

Kabogere era yategeezza nga bwebali basse abakazi abawerako okuli Aisha Namirembe, Munyarwanda Magufuli, Maureen Nakintu Kizza, Hadijja Nalugira n'abalala mu nkola eyasadaaka n'ekigendererwa ekyokwefunira ku nsimbi eza mangu.

Bano poliisi yabatwala mu kkooti e Masaka okutandika okuwozesebwa oluvanyuma lw'okukunganya obujjulizi bwonna obubaluma.

Olunnaku olwa leero bano bakomezeddwawo mu maaso g'omulamuzi wa kkooti esokerwako e Ongwee Stanislaus Okello ne basomerwa emisango 2 okuli ogw'okutta n'okwekobana okutta Omugenzi Hadijja Nalugira.

Omuwabi wa gavumenti asinzidde wano n'ategeezza kkooti nga oludda oluwaabi bwerwamaze okungaanya obujjulizi bwonna era nga bulagira ddala nti bano baza emisango gino bwatyo naasaba Omulamuzi bano basindikibwe mu kkooti enkulu batandike okwewozaako.

Omulamuzi Okello talonzalonzezza bano n'abasindika mu kkooti enkulu batandike okuwerenemba n'emisango egibavunanibwa kyokka n'ategeezza nti obujjulizi obuleeteddwa bwakwesigamwako nnyo mu kkooti enkulu nga etandise okuwulira omusango guno