Abagambibwa okulumba amaka ga Mubarak Munyagwa ne balumya omukuumi we basimbiddwa mu kkooti
Abavunaaniddwa kuliko Allan Safari omugoba wa Boda Boda ng'abeera Kawempe - Maganjo , Medi Yiga eyeeyita Daa 28, ng'abeera Kagoma mu Kawempe, Rodgers Wakibi nga naye mugoba wa Boda Boda ng'abeera Kakeeka zooni mu Lubaga , Ibrahim Ntega avuga Boda ku siteegi ya NIRA e Lubaga ne Nicholas Ssemuju 24, abeera mu Kiganda zooni - Kisenyi mu Kampala.
Abagambibwa okulumba amaka ga Mubarak Munyagwa ne balumya omukuumi we basimbiddwa mu kkooti
By Margaret Zalwango
Journalists @New Vision
Abavunaaniddwa kuliko Allan Safari omugoba wa Boda Boda ng'abeera Kawempe - Maganjo , Medi Yiga eyeeyita Daa 28, ng'abeera Kagoma mu Kawempe, Rodgers Wakibi nga naye mugoba wa Boda Boda ng'abeera Kakeeka zooni mu Lubaga , Ibrahim Ntega avuga Boda ku siteegi ya NIRA e Lubaga ne Nicholas Ssemuju 24, abeera mu Kiganda zooni - Kisenyi mu Kampala.
Bano basimbiddwa mu maaso g'omulamuzi wa kkooti y'eddaala erisooka, Proscovia Nseyirwe, owa kkooti y'e Nsangi ne bavunaanibwa obwakkondo.
Omulamuzi tabakkirizza kubaako kye boogera n'abategeeza nti omusango ogubavunaanibwa gwa nnaggomola nga guwulira kkooti Enkulu yokka.
Kkooti era yabategeezezza nti baddembe okusaba okweyimirirwa mu kkooti Enkulu bwe babeera nga baagadde.
Omuwawaabira omu, Mansur Kwizera atageezezza kkooti nti tamanyi Luganda era tasomeddwa musango kubanga tewali avvuunuula mu lulimi Olufumbira lw'ategeera.
Omuwaabi wa gavumenti Racheal Namutebi ategeezezza kkooti nti okunoonyereza kukyagenda mu maaso n'asaba baweebwe obudde, ate abavunaanibwa basindikiddwa mu kkomera okutuusa nga February 20,2024 okuwulira okunoonyereza mu misango we kutuuse.
Abamu ku bavunaanibwa
Oludda oluwaabi lugamba nti nga December 29,2023 e Nakasozi mu Kyengera Town Council e Wakiso nga bakozesa ekissi, baanyaga Gorret Nantaba essimu ssaako ssente obukadde bubiri.
Kigambibwa nti era oluvannyuma oba wakati mu bunyazi buno baakozesa ekissi Ku Nantaba ngeno yali jjambiya.
Abawawabirwa kigambibwa nti era baayingirira amaka g'eyali omubaka wa Kawempe South mu Palamenti, Mubarak Munyagwa Mugaatigwabbata ne batuusa obuvune ku mukuumi we.