Rwakishakiizi batungire sente za ofiisi ya Luweero kwetunguura
Mpaka ayorekire okukwatwaho ahabwa ab’embembezi abakyereriize sente ezi
Hon. Mwine Mpaka owa Mbarara City South ashateirwe omujwekyerwa omukazi ahabwa disiturikiti ya Budaka, Hon. Kamugo Pamela Nasiyo, barikwakiira ebiconco by'abatuura. PHOTO: Michael Tumwakiire.
Michael Tumwakiire, MBARARA CITY
Ebibiina by’abakazi n’aba bodaboda batungire sente z’okwetunguura okuruga omu ofiisi ya Luwero.
Ebibiina 12 kuruga omu muruka gwa Rwakishakiizi omuri Nyakayojo omumashuuma g’orurembo Mbarara batungire miriyooni 127 okuruga ow’omuny’ishengyero Hon. Mwine Mpaka ezi yaabashakyeire okuruga omu ofiisi y’enganzi y’eihanga omunkora ya Micro Project Support Program 2023/2024.
Kimwe ahabihandiiko ebiriho orukarara rw'ebibiina by'abantu abarikuza kutunga obuhwezi omururembo Mbarara bw'okwetunguura barikuhwerwa ofiisi ya Luweero. PHOTO: Michael Tumwakiire
Omuny’ishengyero wa Mbarara City South hon mwine mpaka ashendekyereziibwe abandi bany’ishengyero 3 basiimire emirimo y’entunguuka eyi Mpaka ariyo naakorera abantu ba Mbarara City South erimu okubajwekyera, akabakiikirira kurungi omu ishengyero hamwe n’okubashakira.
Hon. Mwine Mpaka, omujwekyerwa omu ishengyero ahabw'amashuuma g'Orurembo Mbarara, arikugaaniiraho n'omwe ahabakazi b'ebibiina ebirikuza kwetunguura, omuri Rwakishakiizi Nyakayojo, Mbarara, nyomwebazyo ebiro 31.05.2024. PHOTO: Michael Tumwakiire
Omuny’ishengyero Mpaka ayorekire okukwatwaho ahabwa ab’embembezi abakyereriize sente ezi, okwenda ngu zirabe aha kanso ezi bateireho bushonshorekye.
Ebibiina ebi byegaitsire ahabindi ebyabeire byatungire sente ezi kandi aba bashabirwe okuzikoresa gye omubibiina byabo.
Bamwe ahabantu abahikire ahakwakiira sente za Ofiisi ya Luwero omuri Rwakishakiizi Nyakayojo, Mbarara City, nyomwebazyo ebiro 31.05.2024. PHOTO: Michael Tumwakiire
Abatuura bakoreise omugisha ogu okumugambira ebintu ebi barikwenda ngu abakorere ebirimu enguuto, amaizi hamwe n’amashanyarazi ahi gatakahikire.
#WestUpdates