Purezidenti Museveni yaarabura ba MP ahabushomankuzi - Kyankwanzi

N’ebya Andrew Tushabe

Mukuru w’eihanga, H.E Yoweri Kaguta Museveni kandi orikwebembera ekibiina ekiri omubutegyeki ekya National Resistance Movement, yaakiingaho oruteerane rw’abany’ishengyero ab’ekibiina eki orumazire wiiki yoona ah’itendekyero ry’eby’obwebembezi erya National Leadership Institute omuri Kyankwanzi eriizooba.

Oruteerane oru rukatandika ebiro 07.04.2026 kandi rwahwa eriizooba ebiro 14.04.2026.

Purezidenti Yoweri Museveni obu yaaba naaza kuhendera oruteerane rwa ba MP ba NRM orumazire wiiki 1 omuri Kyankwanzi. PHOTO: PPU

Omubutumwa bwe, Purezidenti Museveni yayehanangiriza abeebembezi kwetantara n’okwangira kimwe oburi bw’enguzi beitu hoona yaabahiga kuhwera abantu kuhangaho obugaiga. Mukuru w’eihanga, atakahendeire ruteerane oru, yabanza yatwara abany’eishengyero aba aha faamu ye omuri Ngoma ahi yaaboorekyera ente n’emigyera agumize ngu omwanya ogu n’ogw’omutaano ahabw’okuhwera abarwani ba NRA omugwa 1984; n’abw’ekyo niyo nshonga ahabw’enki gavumenti yaaguzire eitaka eri – mbwenu abeebembezi nibabaasa kwija beegyereho kandi baijukireho.

Purezidenti Museveni yaayongyera yaagambira abeebembezi kuhwera abantu okuruga omukorera enda kwonka. Kurugiirira ahari Purezidenti, abantu baingi oteiremu n’ab’omuka ye bakaba bahinga ebyokurya kurya kyonka agumize ngu omuri buri maka 100, 9 gonka nigo gaabaire nigaguza ebintu kutunga sente

Kuruga omugwa 1986, gavumenti etwire negambira abantu kwejumba omumirimo erikureeta sente ekirikumanyisa okuhinga ninga okutunga ebyo ebirikubareetera sente nk’omwani ninga amate. Museveni yaagira ngu eki kikozire omumyanya y’abariisa b’ente kuruga Isingiro kuza Masindi. Yaaha eky’okureeberaho kya John Matongo owaabeire ari omworo beitu hati owaagaigahaire ahabw’okuhurikiriza

Purezidenti yaayongyera kurabura abany’eishengyero ahaburi bw’enguzi.

“Omu ishengyero ku haarabemu oburi bw’enguzi, nooha oraashwijume abandi?” nikwo mukuru w’eihanga yabuuza ba MP agumize ngu akahuriraho abantu bamwe barikushaba sente kuhinguza embariirira nikwo kurabura ku eki kishemereire kurekyera aho.

Yaagira ngu ebituga ku biraahikye omu ofiisi, abagarimu nibaija kubingwamu.

Purezidenti kandi hoona nabwo yaagamba ahari sente z’emiruka arikugira ngu sente ezi niibaasa kuhindura amagara g’abantu ku zaakukoresibwa kurungi; n’ahabw’ekyo abantu tibashemereire kwirukangira omumabanka na za kafuna kweguza sente.

Omuhwezi wa mukuru w’eihanga, Jessica Alupo yaayebaza ba MP kandi yaabashaba kuheereza abantu baabo kurungi.

Omuhandiiki mukuru w’ekibiina kya NRM, Richard Todwong yaamanyisa ku abany’eishengyero baraganiise kuba ab’emicwe, kurwanisa oburi bw’enguzi n’okushagika entebeekanisa ezirikugaigahaza Uganda

#WestUpdates