Pooriisi necondooza ahari MP wa Rubirizi Kesande aha mushango gw’okuteera.

N’ebya Job Namanya

KABALE

Pooriisi omu disiturikiti ya Kabale eriyo necondooza oku Omuny’ishengyero-kazi wa disiturikiti ya Rubirizi, Grace Kesande Bataringaya arikugambwa kuba ateire omurumuna ekiti aha mutwe akamuhutaaza.

Oteirwe amanyirwe nka; Christine Charity, omutuura w’omu kyaro kya Rwababa, omu gomborora ya Kyanamira omu disiturikiti ya Kabale. 

Christine Charity, orikugambwa kuba ateirwe Omuny'ishengyero-kazi wa Rubirizi, Grace Kesande Bataringaya.

Orikukurira eby’okucondooza aha Pooriisi ya Kabale, Hakim Mukama naagira ngu omushango gw’okuteera SD REF: 60/13/8/2024 gwaherize kwigurwaho aha muny’ishengyero-kazi Grace Kesande.

Nikigambwa ngu Charity atwire naatunga okutiniisirizibwa kuruga owa mukuru we (MP Kesande) kandi ngu Kesande akamugira ngu ateija kugaruka omu maka gaabo kutaayaayira nyina bo. 

Beitu Charity, ku amanyire ngu Kesande yareeta nyina bo kuruga Kampala ahu atwire agiire kumureeba nikwo Kesande kutandika kumuteera ebihuuzo.

Charity obwa hati nayenda ngu ebiragiro bikore ahari Kesande abaase kutunga oburinganiza.

Tugyerizeho kugamba n’omuny’ishengyero-kazi wa disiturikiti ya Rubiriz, Grace Kesande aha nshonga egi beitu ayehakaine byona ebirikumugambwaho.

#WestUpdates