Pooriisi ekwatsire omushaho w’ekiraguju ahabw’okwitwa kw’abaana.

N’ebya Jeff Andrew Lule

KIBOGA

Pooriisi omu disiturikiti ya Kiboga ekwatsire omufumu ahabw’okugambwa kuba aine akakwate n’okwita abaana 2 n’ekigyendererwa ky’okubahonga

Abaana abaitsirwe bamanyirwe nka; Esther Nakasumba, 2, hamwe na Sylivia Nantongo, 5.

Nyakukwatwa amanyirwe nka; Sulaiman Sentongo, omutuura w’omu kyaro kya Kasenene kandi akwatsirwe embwa ya Pooriisi enkagirizi. Obwa hati ari omu kihome aha Pooriisi ya Kiboga.

Okukwatwa kwe kwizireho bwanyima ya nyina w’abaana aba, Rebecca Nakate kuruga omu kyaro kya Magi omu gomborora eya Kapele ahabiro 03/04/ 2024 kuhababa omushango gw’okubura kw’abaana be.

Okurugiirira aha mugambirizi wa Pooriisi ahabw’ekyanga ekya Wamala, Racheal Kawala, nyina w’abaana ana agyenzire n’abaana be 2 omu musiri beitu na bwanyima aizire yabagira ngu bataahe baze kuteeka ahari shaaha nka 6 z’eihangwe.

Beitu, ku agiire kuhika omuka agweriire akagwe bwanyima y’okushanga abaana batariyo nikwo kuza aha Pooriisi kuhababa.

Omu kugyezaho kuronda abaana abo, naagira ngu omutumbi gw’omwana w’omwishiki gutariho mutwe gushangirwe omu kyaro kya Kyato aharuguuto orwa Kiboga shaaha nka 1:30 z’akasheeshe.

Aizire yamanya ngu omutumbi gubaire guri ogw’omwana we, Esther Nakasumba.

Nabwo, Pooriisi ezoire orupapura ruriho endagiriro ahi ebicweka ebindi eby’omubiri gw’omwana ogu bibaire binagirwe.

Ab’eby’okwerinda bakuratiriize endagiriro egi kandi bashangire emitwe 2 eziikirwe omutanuuro y’amatafaari omu kyaro ekya Kasenene.

Racheal Kawala, naagira ngu barikuhwerwaho embwa ya Pooriisi ekangirizi babaasize kukwata Sentongo oshangirwe nebizibiti omu buju obwarikukoreramu emirimo ye y’obufumu kuhweraho Pooriisi omu kucondooza kwayo. 

#WestUpdates