Pooriisi ekwatsire emwe omumushango gw’okwita Pamela Tumwebaze

N’ebya Omushaki Waitu

Pooriisi nyomwabazyo ehamize okukwatwa kw’omuntu omwe orikujunaanwa okugira akakwate omukwitwa kw’obaire nakuriira enshonga z’abeegi ahari Uganda Christian University, Mukono, Pamela Tumwebaze.

Taewaiko Dak Hussein, owabaireho omukozi wa Tumwebaze akwatsirwe nyomwabazyo omu district eya Budaka ahi abaire ayesherekire. Ogu ashangirwe n’ebizibiti ebirikworeka ku aine akakwate omukwitwa kwa Pamela.

Maj. Tom Magambo, dayirekita wa Criminal Investigation Directorate (CID) arikurabira aha X agiizire ngu tiimu erimu pooriisi hamwe n’aba joint anti-terrorism taskforce (JATT) nibo bakwatsire omushaija ogu.

Magambo naagira ngu omugambirizi wa pooriisi y’eihanga, Rusoke Kituuma naija kuba nahayo ebirikukiraho ahaby’okukwatwa kw’orikujunaanwa.

Tumwebaze aitsirwe ekiro ky’orwakabiri omwinazi otakamanyirwe omutaahiriire omumakagye omuri Gwafu West omuri Mukono municiparite.

Ogu naziikwa eriizooba omuri Keigoshora, Rubaya, Kashari omu district ya Mbarara.