Omushaija n'omukazi we bateirwe ebibaare bibiri babyami baafa
Omushaija n’omukazi we omu district eya Buhweju bafiire bwanyima y’ebibare bibiri kuhiringita kuruga ahakashozi bikagwa ahanju yaabo babamyi.
Apollo Tayebwa, Omugambirizi wa Pooriisi ahabwa Greater Bushenyi
N'ebya Angella Naturinda
BUHWEJU:
Omushaija n’omukazi we omu district eya Buhweju bafiire bwanyima y’ebibare bibiri kuhiringita kuruga ahakashozi bikagwa ahanju yaabo babamyi.
Butandu egi ebaireho nyekiro shaaha 6 omukyaro ekya Kagorogoro omugomborora eya Nyakishana.
Pooriisi yaagira ngu abafiire ni Deus Gumisiriza, 40 n’omukazi we Evelyne Nyamwiza.
Abacondooza nibagira ngu omusisa oguteire ekyanga eki kibaasa kuba nikyo kiretsire ebibare ebi kuhigika, nikwo kuraba omwibaati kuhika ahakitanda ky’abashweraine aba.
Eky’omugisha omurungi, abaana baabo 6 ababaire bari omunju bahoonire betaine buhuta bwona.
Omugambirizi wa pooriisi ey’ekyanga ekya Bushenyi empango, Apollo Tayebwa, naagira ngu emirimo y’abantu n’okutimba amabaare nikyo kikikureetaho emisisa.
Ab’obushoboorozi nibarabura abantu abarikutuura omunshozi okwehara okukwata ahabibaare ebihango n’okugira obuzoora maisho omubwire bw’enjura n’emisisa.