Omushaija acweriirwe kukomwa amagara gye goona ahabw’okwita omukazi we- Wakiso.

N’ebya Beth Akatukunda & Barbra Kabahumuza

WAKISO

Kooti enkuru omuri Wakiso ecweriire omushaija okukomwa amagara gye goona ahabw’okwita omukazi we bwanyima ya ofiisi ya mukuru w’abahababi ba gavumenti okureeta obuhame oburikworeka ngu akaniganiga omukazi ogu mpaka amwitsire.

Boniface Bagabo ahairwe ekifubiro eki ahabiro 21.05.2026 ahabw’okwita omukazi we, Shallot Ngabire.

Kwabaire namuheereza ekifubiro, Omuramuzi Sarah Langa Siu agizire ngu amaka nigwo musingye mukuru omu eihanga kandi tigashemeriire kuba omwanya agwabakundaine kubonaboneramu.

Kooti ehuriire ngu omu kiro ky’ebiro 10.01.2021, Bagabo akaba ari omuka na Ngabire hamwe n’abaana baabo babiri obu muhara waabo yayimukire bwanyima y’okuhurira nyina narira munonga arikugira bamuyambe arikushaba n’okusaasirwa kuhisya obu yaahunamire.

Obujurizi oburetsirwe orubaju oruhababi nibworeka ngu bwanyima y’akaire kakye, Bagabo akeeta baariraanwa nikwo kubagira ngu omukazi we ateriire yaagwa omu kinaabiro.

Beitu hoona, baariraanwa hamwe na Pooriisi bakahika aha mwanya nikwo kushanga Ngabire abyami ahansi omu kinaabiro aine eshagama omu maraka hamwe n'enkojo.

Abahababi becumintiriize obujurizi kuhamya ngu Ndagire akaniganigwa  yayitwa kandi ngu Bagabo akaba atwire aine obuteikirizana n’omukazi we.

Kooti ehuriire okushaba kw’orubaju oruhababi nikwo kucwera Bagabo okukomwa amagara gye goona.

Orubaju oruhababi rubaire rwebembiirwe Omutonganirizi mukuru wa gavumenti, Anthony Wamibu hamwe na Precious Atuhaire kuruga omu ofiisi ya mukuru w’abahababi ba gavumenti.

#WestUpdates