Omuhwezi wa Diisi n’abandi omuri Rakai bakwatiirwe entebe z’eishomero.
Entebe ezi zibaire ziri ez’okuheebwa eishomero rya purayimare erya Kiganda eryatandikirwe aha musingye gw’ekanisa kandi eriri ahansi ya puroguraamu ya boona bashome.
Entebe ezirikugambwa kuba ziburabuziibwe abakuru omu disiturikiti eya Rakai. Ebishushani n'ebya Dismus Buregyeya.
N’ebya Dismus Buregyeya
Ofiisi ya kariisho-riisho wa gavumenti ekwatsire ab’obushoborozi omu disiturikiti eya Rakai n’abandi abarikuteekateekwaho kuba bakoragaine nabo omu kuburabuza entebe ezibaire ziri ez’okuheebwa amashomero ga gavumenti agari ahansi ya puroguraamu ya boona bashome eya UPE.
Omuhwezi wa diisi ahabwa Rakai, Edward Kamya, owabaireho omuhwezi wa ceeyamaani wa disiturikiti, Ismael Bwanika na mukuru w’eby’obwegyese ahabwa disiturikiti egi, Stephen Ssemutono n’abandi bakwatsirwe aharw’okubanza.
RDC wa Rakai, Sarah Kiyimba, obaire ari enyima y’okukwatwa kw’abantu aba ahamiize okukwatwa kwabo.
RDC wa Rakai,Sarah Kiyimba. Ekishushani n'ekya Dismus Buregyeya.
Omukuru kuruga omu ofiisi ya kariisho-riisho wa gavumenti naagira ngu banyakukwatwa nibaija kwoheerezibwa omu kooti erikurwanisa obushomankuzi omuri Kampala.
Wiiki ehwaire, owabaireho omuhwezi wa ceeyamaani wa disiturikiti egi, Ismael Bwanika ayetsirwe Pooriisi kwetonganaho aha birikugambwa ngu bakaburabuza entebe z’amashomero ga purayimare aha UPE ahansi y’enteebekanisa eya School Facilities Grant (SFG).
Pooriisi etaahiriire omu nshonga egi nikwo kukwata entebe ezi bwanyima y’okuzitwara ah’eishomero rya siniya ery’omuntu buntu erya Kiganda omu gomborora eya Luanda omu disiturikiti eya Rakai.
Entebe ezi zibaire ziri ez’okuheebwa eishomero rya purayimare erya Kiganda eryatandikirwe aha musingye gw’ekanisa kandi eriri ahansi ya puroguraamu ya boona bashome.
RDC wa Rakai, Sarah Kiyimba aragiire Pooriisi okweta abarikukwatwaho omu nshonga egi baije bashoborore nk’oku entebe z’amashomero ga gavumenti zihenderiire omu eishomero ery’omuntu buntu erya Kiganda Private Secondary School.
Omugambirizi wa Pooriisi ahabw’ekyanga ekya Southern, Twaha Kasirye, naagira ngu entebe ezi zihairwe omu eishomero erizibaire zitwirwemu kandi obwahati zikumiirwe aha Pooriisi ya Rakai nk’ebizibiti.
Kasirye naagira ngu okucondooza omu nshonga egi kuriyo nikugyenda omu maisho.
#WestUpdates