Bashatu bakwatsirwe ahabw’enyama erikugambwa kuba eri ey’enshuma- Mubende.

N’ebya Omushaki weitu

MUBENDE

Pooriisi omu disiturikiti eya Mubende ekwatsire abantu bashatu abarikuteekateekwaho kuba babaire nibatambuza enyama erikuteekateekwa kuba eri ey’enshuma.

Omugambirizi wa Pooriisi ahabw’ekyanga ekya Wamala, Lameck Kigozi nagira ngu aba bakwatsirwe aba Pooriisi ababaire bari aha potoro kandi bakwatsire n’emotoka y’ekika kya Box-body, namba UBM 838R omu kyaro kya Wakago omu gomborora eya Kalonga.

Ababaire bari omu motoka egi babandize kwanga kwigura kandi eki kigyemesereize Pooriisi okugishendekyereza mpaka aha Pooriisi eya Mubende Central Police Station.

Bwanyima y’okuhika aha Pooriisi, emotoka egi bagigwire kandi bagishangiremu enyama y’ente 9.

Aba bababuuriza ahi bihiire enyama n’ahi babaire nibagitwara kwonka boona bibomeire ah’amatama.

Abakwatsirwe barimu Jamil Mugisha, kuruga omu kyaro kya Kyengera omuri Wakiso District, Andrew Mayambala, omuvugi kuruga Bulenga omuri Wakiso hamwe na Kuluthum Nanfuka, omushuubuzi-kazi kuruga tauni kanso ya Mityana.

#WestUpdates