Amakorero g'emibazi y'enkoko n'ebyokurya byazo gakingirwe - Kampala
Rwamwiri arikworeka emibazi ekwastirwe hati eri omu laboratory za NDA kukyeberwa
N'ebya Nagudi Fatumah, Kampala
Ekitongore ekirikujunaanizibwa aha mutindo gw'eby'emibazi omu ihanga ekya National Drug Authority (NDA) kirikukoregana na pooriisi bakwastire abantu 3 kuruga omumakorero agarikukora omubazi gw'okusirika enkoko hamwe n'ebyokurya byazo kandi baagakinga aharwakataano ebiro 26.06.2026.
Amakorero agakingirwe n'erya Uzima Chicken Factory na Quantum Foods Uganda agarikushangwa Kanyanya - Kampala hamwe na Seeta - Mukono.
Okukinga amakorero aga kwizireho bwanyima y'okushangwa ngu batwire nibakukusa emibazi erikwejunisibwa omubihenda biragiro.
Arikugambaho n'abanyamakuru ahakitebe kikuru ekya NDA, akasheeshe k'eriizooba, omuri Kampala, Abiaz Rwamwiri omugambirizi w’ekitongore eki, yaagira ngu abakwastirwe harimu Respect Khoza orikukora nka manegya w'emirimo ahari Quantum Foods Uganda, Mulygete Anteneh orikukurira eby'okushohoza ebyokurya na Winnie Kobusingye orikukora nk'omushaho w'amatungo ahari Uzima Chicken Factory.
Rwamwiri yagira ngu aba bakwastirwe n'emibazi hamwe n'ebirikukoresibwa ebirikubarirwamu shiringi 100,000,000 kandi ngu obwa hati barindiirwe ahapoorisi ya Wandegeya.
Rwamwiri yayongyera yaayehanagiriza abantu abari kukora omurimo gw'emibazi okuguma nibakuratira engyenderwaho kureebeka ngu abantu baatunga emibazi eri ahamutindo.
#WestUpdates