Abavugi bashatu ba boda basindikirwe omu kihome ahabw’okutoroza abeegi.

N’ebya Omushaki weitu

MUKONO

Abavugi 3 ba boda-boda barebukireho omu maisho g’omuramuzi wa kooti ya Mukono, Paul Watyama ahabw’okugambwa kuba baatoroboize abeegi abu baabaire nibatwara ahamashomero.

Abashatu abarimu; Ali Ssentongo, 27, omutuura wa Ndese omuri Mukono, Shafik Nsubuga na Juma Sayd Mukiibi, 21, omutuura wa Kimenyedde.

Abazaire b'abaana aba bakeesiga abavugi ba boda aba kuguma nibabatwarira abaana baabo ah'eishomero.

Abahababi beebembiirwe Marvin Ninyesiga nibagira ngu abashatu aba nibagambwa kuba baakozire omushango ogu ahagati y'ebiro 04.01.2026 hamwe n'ebiro 17.01.2026 omu kyaro ekyya Ndese na Jjumbwe omu disiturikiti eya Mukono.

Ssentongo na Nsubuga bakaheebwa omwoga gw’okutwara abaishiki ah’eishomero ry’omu kyaro kya Ndese burizooba.

Arikugambaho n’abanyamakuru aha kitebe kikuru kya Pooriisio muri Naguru, Kampala aha kutandika kwa wiiki egi, Omugambirizi wa Pooriisi ahabwa Kampala n’emyanya egiheerire, Racheal Kawala agizire ngu abavugi ba boda-boda aba baarebize abazaire ababatiiremu obwesigye bw’okubatwarira abaana ahamashomero.

“Aba baarebize abazaire ababatiiremu obwesigye. Aha mwanya gw’okutwara abaana ahamashomero, babaire nibabatwara ahandi baaza kubyama nabo,” Kawala arikugamba.

Ssentongo nagambwa kuba yatoroboize omwegi w’omwishiki w’emyaka 15 ou yabaire atwire natwara ah’eishomero ahabiro 24.02.2026 kandi ogu akamutoroboza na Nsubuga.

Beitu we Mukiibi nagambwa kuba yaatoroboize omwegi w’emyaka 17.

Barikureebukaho omu kooti, abashatu aba behakiine emishango nikwo kusindikwa aharumanda omu kihome kya Kauga okuhisya ebiro 16.03.2026 obu barikuteekateekwa kwija kugaruka omu kooti kushomerwa emishango yaabo.

#WestUpdates