Abarambuzi 5 batungire butandu omuri Nwoya.

N’ebya Christopher Nyeko

NWOYA

Abantu bataano batungire obuhuta omuri butandu ebaireho Orwamukaaga omu gomborora eya Gotapwoyo omu disiturikiti eya Nwoya.

Abarambuzi aba ababaire nibatamburira omu motoka ehandiikirwe omu namba ya UBL 104F, babaire nibaruga omu eirindiro ry’enyamaishwa erya Murchison Falls National Park barikuza Kampala. 

Emotoka yaabo eteire omu biina nikwo kwekunamura, ekireteire baatunga obuhuta.

Okurugiirira ahari rupoota ey’ebiro 22.06.2024, abahuteire barimu; Emily Loper, 27, enzaarwa ya America, Jenifer Nasozi, 52, omunya-Uganda, Clayton Lopelo, 24, enzaarwa ya America na Claris Mwesigwa, enzaarwa ya Uganda.  

Aba bairukangiziibwe ah’eirwariro erya Anaka omu disiturikiti eya Nwoya kutunga okuragurirwa.

Dr James Okello, Omushaho ah’eirwariro eri agambiire Tv West ngu abahuteire boheereziibwe omu marwariro g’omuri Kampala omu eihangwe gwa Sande kwongyera kutunga okuragurirwa.

David Mudong Ongom, Omugambirizi wa Pooriisi ahabw’ekyanga ekya Aswa naagira ngu emotoka etungire butandu etwirwe aha Pooriisi ya Nwoya obwo Pooriisi erikuhiiga dureeva waayo.

Naagira ngu omushango gwigwirweho aha Pooriisi aha namba TAR 53/2024.

#WestUpdates
#RadioWestAt25