16 bafeereire omuri butandu omuri Kagadi barikuruga aharufu

16 bafeereire omuri butandu omuri Kagadi barikuruga aharufu

N’ebya Andrew Musinguzi

Abantu 16 bafeereire omuri butandu ahanguuto nyeigyendwa ey Kagadi-Kyenjojo omu tauni kanso ya Nyanseke-Muhorro omu disiturikiti ya Kagadi omukiro kyabusheesha eriizooba.

Butandu egi ebaire ahagati ya fuso namba UAD 431Q na takisi namba 426V.

Orikukora nk’orikukurira pooriisi ey’ahanguuto omuri Kagadi, Alex Akampulira yaagira ngu takisi egi ebaire neza Kagadi erikuruga Fort Portal nk’ahari shaaha 1:30 z’omwabazyo gwa Sunday nikwo kutomerana na fuso ebaore neza Kyenjojo haihi n’orutindo rwa Muziizi.

Akampulira butandu egi yagyegyekyerera dureeva wa fuso oremirwe kutsiba nikwo kutomera takisi ebaire eri orubaju orundi.

Abaingi abafiire aharimu dureeva wa takisi, Henry Acaali, babaire bari abatuura ba tauni kanso ya Kagadi kandi babaire nibaruga kuziika omu rurembo orwa Fort Portal. Beitu abandi abafiire tibakamanyirwe ebirikubakwataho.

Meeya wa tauni kanso eya Kyamutunzi, Mustafa Maliiro yaagira ngu butandu enyingi ezitsire abantu zibaire ahamwanya ogu.

Omuduumizi wa pooriisi ya Kagadi, Patrick Opiyo yaagira ngu emibiri y’abafiire etwairwe omukabafu ah’eirwariro erya Kagadi.

Abantu bataano abahonire bariyo nibajanjaabirwa ahamarwariro aga Muhorro Community HC n’erya Kagadi.

Omuri aba bataano, omwe abaire ari omu takisi kandi abandi bana babaire nibatamburira omuri fuso.

#WestUpdates