Muyige okulengera ewala - Musumba

Bya Vivien Nakitende

Omusumba Michael Muwanguzi Mukutulanjegere ow'ekkanisa ya Sanctuary of Hope Church e Kabowa, yeebazizza Katonda olw'okutuyisa mu mwaka omukadde 2022 n’okutuyingiza omupya ogwa 2023.

Asabye abantu okuyiga okulengerera ewala, kuba Katonda ebintu bingi by’asobola okukolera abantu naye nga babirengedde.

Abakubirizza okukozesa amaaso g'omwoyo okulengera ewala, nga wadde balina kitono naye basobole okulengera ekinene era bakikolerere mu mwaka mupya ogutandise, Katonda asobole okukibatuusaako..

Abagoberezi Nga Basaba

Awadde ekyawandiikibwa mu kitabo kya  Lubereberye 13;14 ekigamba nti, "Yimusa amaaso go kaakano otunule ng'oyima mu kifo mw’oli otunule mu bukiikaddyo, obukiikakkono, e buvanjuba n'ebigwanjuba, kubanga byonna by'olabye ndibiwa ggwe n'abaana bo"

Ategeezezza abantu okwefumiitiriza n'okuyiga okwebuulirira okw'omunda baziyize ebikolobero bingi ebibaawo mu ggwanga, baleme okweraba mu lwaleero lwokka,  batunuulire ne mu biseera by'omu maaso .

Akubirizza abagoba b'emmotoka okukomya okuvuga endiima gy’agambye nti etutte obulamu bw'abantu bangi, n’ategeeza nti atambula empola atuuka wala, beesige Katonda kubanga bw'oba naye otuuka wala n’ofuna n’ebirungi bingi.

Bwe zaaweze ssaawa 6:0 eziyingira omwaka omupya 2022, n’afuuwa omulere ng'akabonero akalaga okutuuka mu mwaka omupya, n’asaba Katonda gube gwa ssanyu jereere.